Tolosako Udal Gobernuak 2025-2027rako Etxebizitza Planaren lehen urteko balantzea egin du, eta lau ardatz estrategiko nagusien inguruan egindako lanaren emaitzak nabarmendu ditu: alokairu eskuragarria sustatzea, eraikitako parkea birgaitzea, alokairurako prestazio eta laguntzen sistema indartzea, eta gobernantza-sistemak eta koordinazio instituzionala hobetzea.
Udal gobernuak etxebizitza lehentasun politiko gisa azpimarratu du, eta konpromisoak ekintza zehatzetan gauzatzen ari dela adierazi du. Planak etxebizitza duin, egoki eta eskuragarria bermatzea du helburu, bereziki gazteei eta egoera zaurgarrian dauden herritarrei begira. Horren harira, Tolosa bizitegi-merkatu tentsionatuko eremu izendatu zen otsailean, eta Amarozko paper-fabrika zaharraren eremuan 192 babes ofizialeko etxebizitza eraikitzeko lanak hasi dira, alokairura bideratuko direnak.
Gainera, udala lanean ari da beste 104 etxebizitza babestu alokairuan sustatzeko eta Iurramendin belaunaldiarteko 15 etxebizitza proiektua garatzeko. Egungo etxebizitza parkea birgaitzea eta hutsik dauden etxebizitzak alokairura ateratzea ere helburu du planak. Horretarako, neurri fiskalak indartu dira, %95eko hobaria ezarriz Alde Zaharrerako, Euskal Herria plazarako eta Santa Klararako, besteak beste. Lokal batzuk etxebizitza bihurtzeko ordenantza egokitzen ari da udala, eta San Frantzisko 37ko eraikinean gazteentzako etxebizitza dotazionalak sortzeko proiektua ere aurrera doa.
Herritarrei zuzendutako laguntzak ere indartu dira. 2025ean, 21 gaztek jaso zituzten emantzipaziorako laguntzak, guztira 64.174,40 euro. Alokairurako udal ordenantza berriak onuradunen profila zabaldu eta laguntzen zenbatekoa handitu du, bereziki Alde Zaharreko, Euskal Herria plazako eta Santa Klarako eremuetarako. Bizigune programara atxikitzen diren etxebizitzetan egokitzapen lanak egiteko diru laguntzak ere berritu dira.
Etxebizitza hutsak merkaturatzea ere lan ildo garrantzitsua da. Udalak aholkularitza eskaintzen die tolosarrei, eta Alde Zaharreko hainbat eraikinen jabekideekin harremanetan da alokairu parke publikoa handitzeko. Etxe hutsen gaineko OHZren errekargua %150era igoko da 2027tik aurrera, eta Bizigune programan sartzen diren etxebizitzek %95eko hobaria izango dute.
Andu Martinez de Rituerto, Tolosako alkateak, tokiko erakundeen garrantzia azpimarratu du etxebizitza-politiketan: «Agintaldi honetako lehentasunezko gaia da, eta helburua da herritarrei, batez ere behar gehien dutenei, etxebizitza duin, egoki eta eskuragarria bermatzea». Erakundeen arteko elkarlana ere ezinbestekotzat jo du, udal-eskumenak eta baliabideak mugatuak direla aitortuz.
