Renfe operadoreak jakinarazi duenez, trenbide azpiegituran aurreikusitako hobekuntza lanek aldaketak eragingo dituzte distantzia luzeko trenen ordutegietan eta ibilbideetan. Tolosa zeharkatzen duten zerbitzuen kasuan, bidaiariek autobus zerbitzu alternatiboa erabili beharko dute geltokian.
Autobusak Geltoki plazan egingo du geldialdia. Hori dela eta, eremu horretan aparkatuta dauden ibilgailuen jabeek kontu handiz ibili beharko dute, eta zehaztutako guneak libre utzi beharko dituzte garraio publikoaren funtzionamendu egokia bermatzeko.
Aldaketak hainbat epealditan banatuko dira: uztailaren 24tik 27ra, abuztuaren 14tik 20ra, eta abuztuaren 28tik irailaren 3ra. Epe horietan, Irun eta Gasteiz arteko distantzia luzeko tren batzuen ordez errepideko garraioa eskainiko da.
Era berean, uztailaren 24tik irailaren 7ra bitartean, Irun-Tolosa eta Iruñea-Donostia arteko zerbitzuetan ere egokitzapenak izango dira. Eragindako trenen artean Alvia eta Intercity zerbitzuak daude.
