Guztira, 40 zeramika pieza inguru egokitu dira erakusketara, hamazazpi egileren lanak biltzen dituztenak. Bertan, eskulturak, muralak, tazak eta platerak aurki daitezke. Elkarteko kideen arabera, aurtengo erakusketak berrikuntza bat du: egileen izenak ez jartzea erabaki dute, "hastapenetan daudenei bultzadatxoa emateko eta erakusketa soilik Buztinzale Elkartearen izenean egiteko".
Urritik aurrera hasiko da zeramikaren munduan murgildu nahi dutenentzako ikastaroa. Saioak urritik ekainera bitartean izango dira, Pott Keramika tailerreko artisauek zuzenduta. Jarduerak Buztinzale elkartean garatuko dira Bergaran, astelehenetan, 17:30etik 19:30era.
18 urtetik gorakoek har dezakete parte ikastaroan. Prezioa ikasle kopuruaren eta hilabetean egiten diren saioen araberakoa izango da. Hamabi laguneko taldea osatuz gero, bazkideek orduko lau euro ordainduko lukete, eta bazkide ez direnek sei euro. Izen-ematea buztinzaleak@gmail.com helbidean egin daiteke.
