Arabako Parke Teknologikoan egindako topaketan, Eusko Jaurlaritzak Lanera enpresa sarea jarri du martxan. Ekimen honen helburua da euskararen erabilera sustatzeko konpromisoa duten enpresak elkartzea, elkarlana bultzatzea eta lan mundurako neurri praktikoak elkarrekin garatzea.
Topaketan 80 enpresa inguru bildu dira. Jardunaldiak esperientziak partekatzeko, aliantzak sortzeko eta euskara balio erantsi, lehiakortasun eta kohesio sozialerako elementu gisa kokatuko duen ikuspegi partekatua eraikitzeko balio izan du. Hau ez da jardunaldi soil bat izan, baizik eta Lanera sarearen lehen aktibazio publikoa, enpresen arteko harremanak sortzeko eta etorkizuneko lankidetza ildoak martxan jartzeko lehen espazioa.
Aitor Aldasoro Hizkuntza Politikarako sailburuordeak irekiera hitzaldian azpimarratu du euskararen etorkizuna ez dela administraziotik bakarrik erabakitzen, baizik eta "eguneroko jardunean, aisian, kirolean, etxean eta lanean". "Horregatik, enpresen konpromisoa euskararen etorkizunaren alde ezinbestekoa da. Gaurko jardunaldia ez da ekitaldi soil bat: elkarlanean aritzeko konpromisoa hartzeko gune baten sorrera da", ziurtatu du.
Aldasorok adierazi du sare honekin "pauso bat harago eman nahi dugu. Jauzi bat egiteko lankidetza abiatu dugu: ekimen edo tokiko proiektuetatik enpresa komunitate batera igaro nahi dugu". Azken hilabeteotan, Lanera egitasmoak entzute eta diagnosi fasea garatu du, 21 eskualde, hiru hiriburu eta 300 ordezkari baino gehiagoren ekarpenak jasoz, eta 600 esperientzia baino gehiago identifikatu eta mapatuz.
Sailburuordeak mezu nagusi bat plazaratu du: "Euskararen jauzia ez da administraziotik bakarrik etorriko. Elkarrekin egingo dugu, enpresekin eta gizarte osoarekin batera. Eta horretarako 'Jauzia Gara' markoa dugu martxan".
Jardunaldian parte hartu dute, besteak beste, Jose Luis Azkue Industria Garapen eta Administrazioaren zuzendariak, Galder Lasuen Euskaliteko proiektu arduradunak, eta enpresa esperientziak partekatu dituzten Iraitz Perez de Goldarazena (Oreka IT), Galder Uriarte (Patxi Koop) eta Ane Bergaretxe (AMPO) ordezkariek. Saioaren dinamizazioa Sonia Rodriguez Hizkuntza Ikerketa eta Koordinaziorako zuzendariak egin du.
Lanera egitasmoak "aipamen berezia" du Euskararen Plan Estrategikoaren barruan, ezagutza eta erabilera ardatzetan kokatuz. Helburu nagusia da euskararen erabileran jauzi kualitatiboa ematea lan esparruan, hiru oinarri nagusiren bidez: euskara lan munduan txertatzea, lankidetza sareak indartzea eta lidergo instituzional partekatua aktibatzea.
Orain, egitasmoa diagnostikotik aktibaziora igarotzen da, enpresak saretu, baliabideak partekatu eta euskararen erabilera sustatzeko komunitate egonkor bat eratuz. Jaurlaritzak enpresa sare iraunkorra aktibatzea, tresnak eta laguntzak eskaintzea, laguntza eragileen sarea antolatzea eta aurrerapen planak garatzea konprometitu ditu.
