Tailer honen helburua da ipuinak kontatzeko moduak, giroak eta baliabideak nola eragin dezaketen haurren garapen emozionalean eta komunikatiboan aztertzea. Parte-hartzaileek galdera garrantzitsuei erantzunak aurkituko dizkiete, hala nola, noiz eta nola kontatu ipuinak, irakurtzea edo ahoz kontatzea hobe den, eta istorio bakoitzerako giro egokia nola sortu.

Saioa Pello Añorga ipuin-kontalari ezagunak gidatuko du, eta bere esperientzia eta jakintza partekatuko ditu bertaratzen direnekin. Jarduera euskaraz izango da, baina gaztelaniarako zuzeneko itzulpen zerbitzua ere eskainiko da, edonork parte hartzeko aukera izan dezan.

Hitzordua maiatzaren 7an izango da, arratsaldeko 17:30ean, Samaniegoko Haur Hezkuntzako eraikinean. Jarduera doakoa da eta herritar guztiei irekita dago, nahiz eta bereziki 7 urtetik beherako haurrekin harremana duten pertsonei zuzenduta egon. Gainera, zaintza zerbitzua egongo da, familiek lasaitasunez parte hartu ahal izan dezaten.

Ipuinak tresna indartsuak dira haurrekin harreman afektiboak sendotzeko, komunikazioa lantzeko eta irakurzaletasuna sustatzeko. Aukera paregabea da baliabide berriak eskuratu eta egunerokoan aplikatzeko.