Agurain izan da gaur arratsaldean Arabako Lautada ko segurtasunari buruzko Basque Segurtasun Foroa ren egoitza. Topaketa honetan, eskualdeko 30 bat ordezkari sozial, ekonomiko eta instituzional bildu dira, etorkizuneko segurtasun erronkei aurre egiteko baterako erantzuna hobetzeko esperientziak eta proposamenak jasotzeko helburuarekin. Gai nagusien artean, prebentzioa, larrialdiak kudeatzea, zibersegurtasuna, bide-segurtasuna eta bizikidetza izan dira hizketagai.

Ekitaldiak parte-hartze zabala izan du, besteak beste, Bingen Zupiria Segurtasun sailburua eta Iñaki Gurtubai Arabako Foru Aldundiko Berdintasun, Euskara eta Gobernantza diputatua bertan izan direlarik. Horiez gain, Agurain, Alegria-Dulantzi, Asparrena, Barrundia, Elburgo, Iruraiz-Gauna, San Millán eta Zalduondo udalerrietako ordezkari instituzionalak, Lautadako tokiko agenteak, administrazio batzordeak, Ertzaintza eta udaltzaingoen arduradunak, Babes Zibila, Osakidetza, eta eskualdeko landa-garapen, merkataritza, hezkuntza zentro eta enpresa elkarteetako ordezkariak ere izan dira bertan.

Topaketa hau Basque Segurtasun Foroa ren prozesu parte-hartzailearen barruan kokatzen da, eta dagoeneko hogeita bederatzigarren bilera izan da. Aurretik, Txorierri, Hernanialdea, Urdaibai, Urola Garaia, Uribe Kosta, Urola Erdia, Vitoria-Gasteiz, Ibaizabal, Bidasoa, Mungialdea, Goierri, Debagoiena, Meatzaldea, Errioxa eta Arabako Mendia, Oarsoaldea, Bilbao, Aiaraldea, Urola Kosta, Lea-Artibai, Ezkerraldea, Debabarrena, Enkarterri, Araba eta Gipuzkoa eta Bizkaia eskualdeetan ere egin dira antzeko topaketak, baita gazteekin egindako batzar bat ere.

Foroaren helburua da segurtasunaren inguruko diagnostiko partekatua eraikitzea, ikuspegi integral batetik abiatuta. Erakunde, entitate eta agente desberdinek topagune bat izango dute kezka sortzen dieten segurtasun-gaiak lantzeko.