Sindikatuek adierazi dutenez, greba deialdiak babes handia lortu du Euskal Autonomia Erkidegoko hiri eta herri nagusietan, besteak beste, Bilbo, Gasteiz, Donostia, Barakaldo eta Errenterian. Horrez gain, Hernani, Arrasate eta Bergara bezalako udalerrietan, langileen asanbladek udalak ixtea erabaki dute greba egunean.
Getxon, langile batzordeak mozio bat onartu du eta grebarekin bat egin du; gainera, elkarretaratze bat egingo dute udaletxearen aurrean. Erandion, Leioan eta Sopelan ere deialdiak babes zabala jaso du, eta beharginek Udalhitzeko lan-hitzarmenaren berritzea eskatuko dute.
“"Negoziazioa oso motel doa eta eduki zehatzak falta dira."
Mobilizazio hauen arrazoi nagusia udal langileen lan-baldintzen prekarizazioa da. Sindikatuen arabera, 16 urte daramatzate Udalhitzeko lan-hitzarmena berritu gabe. Egoera horretan, erosahalmena galdu eta Madrilgo Gobernuak ezarritako murrizketak onartu direla salatu dute.
Azken negoziazio mahaia maiatzaren 7an egin zen, baina ELA eta LAB sindikatuen ustez, Eudel eta alderdi politikoen (EAJ, EH Bildu, PSE-EE eta independenteak) proposamenak oraindik ez dira nahikoak. Grebaren bidez, negoziazioa bizkortzea eta urteetako gatazkari irtenbidea emango dion proposamen integral bat lortzea espero dute deitzaileek.
