Science zientzia-aldizkari ospetsuak bere azken editorialean aztertu ditu Ozempicen eta gainerako GLP-1 agonisten espero gabeko ondorioak. Egileek, Amsterdameko Unibertsitateko Luc. L Hagenaars eta Kaliforniako Unibertsitateko Laura A. Schmidt, egungo egoerari “Ozempic-en aroa” deitu diote, non GLP-1 agonistek dena hartu baitute: zientzia-aldizkariak, klinikak, merkatua, sare sozialak eta herritarren gogoa.
Hasiera batean diabetesa tratatzeko farmako gisa erabiltzen baziren ere, orain tratatu ditzaketen kondizioen zerrenda luzatu egin da, larruazaleko gaitzak, zakila zutitzeko disfuntzioa, ugalkortasun-arazoak eta adikzioak barne. Egileek alderdi onak eta txarrak aztertu dituzte, eta ondorioztatu dute arriskua dagoela gizarte-desberdintasunak areagotzeko eta obesitateari buruzko ikuspegi okerra nagusitzeko. Horrenbestez, Osasunaren Mundu Erakundeari (OME) esku har dezan dei egin diote.
“"GLP-1 agonistek dena hartu baitute: zientzia-aldizkariak, klinikak, merkatua, sare sozialak eta herritarren gogoa"
Aipatu dutenez, OMEren gidalerro globalak GLP-1 farmakoen erabilera egokia azaltzen du eta marko bat ezartzea proposatzen du denentzat eskuragarri izan daitezen. Gainera, botika horiek janari ultraprozesatuarekiko grina apaltzen dutela nabarmendu dute, eta horrek erraztu egiten du ultraprozesatuei buruzko politikak zorroztea. Obesitate klinikoa duten pertsonen erruduntasuna arintzeko ere balio dute, egoera hori ez dagoela guztiz norberaren esku ulertzen baita.
Bestalde, GLP-1en merkatuaren liderrak, Eli Lilly eta Novo Nordisk konpainia farmazeutikoak, beren ikuspegia indartzen ari dira: obesitatea gaixotasun kronikoa da eta ez da behin betiko gainditzen. "Obesitate aurrekliniko" kategoria ere sortu dute, eta norbanakoan zentratzeko marko oso bat eraiki dute obesitatearen aurkako ahalegina egiteko.
“"marko oso bat eraiki dute norbanakoan zentratzeko obesitatearen aurkako ahalegina"
Ikuspegi horrekin bat egiten dute Amazonek eta ongizateari lotutako plataformek, GLP-1 erabiltzaileei zuzendutako bizi-ohituren programekin eta telemedikuntzako gomendioekin. Elikagai industriak, bere aldetik, beti erakutsi du egokitzeko gaitasuna. Denek merkatu berean lehiatzen badute ere, elkarri laguntzen diote obesitateari buruzko ikuspegi jakin bat eraikitzen, norbanakoetan indarra jarriz eta irabazi ekonomikoak lehenetsiz.
Editorialaren egileek uste dute OMEk esku hartu beharko lukeela, GLP-1 farmakoak baliagarriak izan daitezen osasun-diskriminazioa murrizteko, areagotu beharrean.
