Osakidetzako profesionalek, Ezkerraldea-Enkarterri-Cruces OSI ren ekimenez, bihotz-biriketako geldialdiak ezagutzen, RCP egiten eta desfibriladoreak erabiltzen irakatsi diete herritarrei Crucesen eta Balmasedan. Jardunaldi hauek bihotz-biriketako suspertzearen egunaren harira antolatu dira, eta herritarrei zuzendutako tailer praktikoak eskaini dituzte.
Gurutzeko Unibertsitate Ospitaleko plazan, Anestesiologia, ZIU, Larrialdiak eta Pediatriako profesionalek, Emergentziak Osakidetzako profesionalekin batera, "Prest zaude bizitza bat salbatzeko" lelopean, tailer praktikoak eman dituzte. Bertan, bihotz-biriketako geldialdi bat nola ezagutu, larrialdi-zerbitzuak aurreratu, oinarrizko suspertze-maniobra batzuk egin eta desfibriladore automatiko bat (DEA) nola erabili azaldu dute.
Aldi berean, Balmasedako Osasun Zentroko profesionalek goiz osoan zehar tailer praktikoak antolatu dituzte herritarrentzat, ezagutza horiek herriko bizilagunengana hurbiltzeko eta komunitatearen prestakuntza indartzeko, batez ere horrelako egoeretan lehenbailehen jarduteak erabakigarria izan dezakeelako.
Bi ekimenen helburua da biztanleriaren artean bihotz-biriketako suspertzeari buruzko ezagutza eta praktika handitzea, eta ospitalez kanpoko bihotz-biriketako geldialdi baten aurrean herritarren erantzuteko gaitasuna hobetzea. Urtero, Euskadin 600dik gora ospitalez kanpoko bihotz-biriketako geldialdi erregistratzen dira Emergentziak zerbitzuak artatuta, eta biktimen %40 baino gutxiagok jasotzen dute lekukoen eskutik suspertze-maniobrarik larrialdi-zerbitzuak iritsi aurretik.
Jardunaldiak bizitzaren kateko lehen kate-begietan jarri du arreta: bihotz-biriketako geldialdi bat ezagutzea, 112ra azkar deitzea, bularreko konpresioak hastea eta desfibriladore bat erabiltzea eskuragarri dagoenean. Prestakuntza praktiko honek aukera ematen die herritarrei osasun-baliabideak iritsi bitartean aldea eragin dezaketen oinarrizko trebetasunak eskuratzeko.
Jarduera honekin, OSI Ezkerraldea-Enkarterri-Cruces ek prebentzioaren, osasunaren sustapenaren eta osasun-hezkuntzaren aldeko konpromisoa indartzen du, herritarrei bizitzak salbatzen lagun dezaketen ezagutzak hurbilduz.
