Arrigorriagako Ausartak Mendi Lasterketaren zortzigarren edizioa 2026ko urtarrilaren 16an izango da. Aurreko edizioan, 824 korrikalarik hartu zuten parte, aurreko urtean baino 100 gehiago. Lasterketaren zazpigarren edizioan, euria eta lokatza izan ziren protagonista nagusiak, eta 583 gizonek (%70) eta 241 emakumek (%30) parte hartu zuten.
Bestalde, ‘Emakume Sortzaileen Azoka’ ren bosgarren edizioa urriaren 3an antolatu du Lamiaena Arrigorriagako Emakumeen Etxeak, Teodosia Ortega parkean. Izena emateko epea irailaren 1etik 13ra zabalik egongo da, aurrez aurre edo egoitza elektronikoaren bidez.
Osasun Sailak eta Osakidetzak 6,3 milioi euroko aurrekontua bideratuko dute Arrigorriagako osasun-zentro berriaren lanetarako, eta hauek 2028ko lehen hiruhilekoan hasiko dira. Eraikin berria Teodosia Ortega parkeko hegoaldeko muturrean kokatuko da, 1.564 metro koadroko lurzati batean, eta hiru eremu berri izango ditu: familiako medikuntzakoa, ama-umeena eta fisioterapiakoa.
Arrigorriagako Udalak 6.000 euro bideratuko ditu datorren ikasturtean euskara ikasteko bekak ematera. Bekak udal Euskaltegian edo HABEk homologatutako zentroetan ikasi dutenei zuzenduta daude, eta eskaerak irailaren 30era arte aurkez daitezke. Eskatzaileek Arrigorriagan erroldatuta egon behar dute.
Udala ‘Berriro’ sistema digitalaren aldeko apustua egiten ari da, tokiko merkataritza sustatzeko. Plataforma honek bezeroei abantailak eta sariak eskainiko dizkie herriko negozioetan egindako erosketengatik, ekonomia zirkularra eta lankidetza bultzatuz. Maite Ibarra alkateak azpimarratu duenez, "'Berriro' bezalako plataforma baten alde egitea gure herriko bizitzaren alde egitea da".
Azkenik, Madalenetako Giza Probak ekitaldian, Jaskoka Herri Kirolen Elkarteak ikuskizun paregabea eskaini zien herritarrei, beroari eta hezetasunari aurre eginez.
