Kanpaina honek tonu hurbila eta zuzena izango du, eta Leioa atseginagoa, seguruagoa eta hobeto zaindua mantentzeko deia luzatuko die herritar guztiei. Iban Rodriguez Etxebarria Leioako alkateak azpimarratu duenez, maskoten gorotzak jaso gabe uzteak, hondakinak paperontzietatik kanpo botatzeak, hiri-altzariak kaltetzeak, ibilgailuen abiadura desegokiek edo bidegorriaren erabilera okerrak "auzotarren artean deserosotasuna" sortzen dute eta bizikidetza kaltetzen dute.
Horri aurre egiteko, Udalak sei irudi sortu ditu kanpainarako, guztiak "Ei!" deiadarra elementu komun dutela. Bost irudik herritarren kezka nagusienetako batzuk jorratzen dituzte: txakurren gorotzak jasotzea, abiadura moteltzea, bidegorriak behar bezala erabiltzea, hondakinak paperontzietara botatzea eta hiri-altzariak ez kaltetzea.
Datozen asteetan, kanpainak presentzia nabarmena izango du herriko espazio publikoan. Kartelak jarriko dira parke eta lorategietan, pegatinak paperontzietan, eta biniloak merkataritza zein ostalaritza establezimenduetan, mezu hau zabaltzeko.
Udalak nabarmendu du kanpainaren helburua ez dela zigorretan arreta jartzea, baizik eta kontzientzia kolektiboa indartzea. Hala ere, gogorarazi du jokabide ez-zibilek kostu ekonomiko nabarmena dutela: banku bat ordezkatzeak 500 euro balio dezake, eta paperontzi batek 700 euro inguru. Era berean, bide publikoan hondakinak uzteagatik 200 eta 400 euro arteko isunak ezar daitezke, eta animalien gorotzak ez jasotzeagatik, 300 eurorainokoak.
Patinete elektrikoen erabilerari dagokionez, arau-hauste larriek 1.000 eurorainoko isunak ekar ditzakete alkohola edo drogak kontsumituta gidatzeagatik; 800 eurorainokoak nahitaezko asegururik gabe ibiltzeagatik; eta 500 eurorainokoak abiadura gainditzeagatik. Espaloietatik edo debekatutako guneetatik ibiltzea, gauez argirik gabe zirkulatzea edo mugikorra zein entzungailuak erabiltzea ere zigortu daiteke.
Kanpaina herritarrek egindako eskaera batetik sortu dela azaldu du Udalak, eguneroko bizitzan, bizikidetzan eta udalerriaren irudian eragina duten jarrera jakin batzuen aurrean kontzientziazio handiagoa eskatu baitute.
