Akordioa Basurtuko Unibertsitate Ospitalean formalizatu da, eta 2025-2032 aldirako Osasun Azpiegitura eta Ekipamenduen Programaren barruan kokatzen da. Guztira 1.600 milioi euroko inbertsio estrategikoa aurreikusten duen plan honen lehen fasea da, 250 milioi euroko maileguarekin abiatuko dena.
Inbertsio horiek euskal osasun-sarearen erresilientzia eta eraginkortasuna hobetzea dute helburu. Proiektuen artean, Galdakao-Usansolo, Donostia, Gurutzeta eta Txagorritxuko unibertsitate-ospitaleak berritzea eta handitzea nabarmentzen dira, baita Tolosako ospitale berriaren eraikuntza ere.
Lehen mailako arretari dagokionez, 200 milioi euro baino gehiago bideratuko dira 21 osasun-zentro berri eraikitzera eta beste zortzi zentro handitzera. Gainera, teknologia mediko aurreratua txertatuko da, hala nola minbizia tratatzeko protonterapia unitate berria.
“"Eusko Jaurlaritzak eta Europako Inbertsio Bankuak helburu partekatu batekin elkartzen ditugu gure bideak: EAEko herritar guztiei osasun-azpiegitura eta -ekipamendu onenak ematea."
