Ekitaldiak espazio publikoetan izango dira, eta interesdun guztiak gonbidatuta daude ikustera eta parte hartzera. Egutegia honakoa da: Arrankudiaga-Zollon maiatzaren 29an (ostirala) 16:00etan Elexalde plazan; Urduñan ekainaren 5ean (ostirala) 11:00etan Foru plazan; Orozkon ekainaren 6an (larunbata) 10:30ean Zubiaur plazan; eta Etxebarriren kasuan, ekainaren 8an (astelehena) 11:00etan Udaletxearen aurrean (Sabino Arana 1).

Jardunaldi hauek, gutxi gorabehera bi orduko iraupenarekin, errefusaren edukia aztertzeko aukera emango dute. Horrela, edukiontzi grisetan bildutako materialaren zenbat zati bereiz daitezkeen ikusiko da bilketa selektiborako beste edukiontzietan.

Prozesuan, aurretik jasotako hondakin-poltsak ireki eta materialak eskuz sailkatuko dira kategoria hauetan: materia organikoa, ontziak, papera eta kartoia, beira eta errefusa, besteak beste. Amaitzean, hondakin mota bakoitza pisatu egingo da, birziklatu zitekeen hondakin portzentaia zehazteko.

Ekimenaren helburua da herritarrei egunero sortzen ditugun hondakinen errealitatea gerturatzea eta ohitura arduratsuagoak eta jasangarriagoak sustatzea. Antolatzaileek herritar guztiak animatzen dituzte ekitaldietara joatera, prozesua ikustera eta dibulgazio eta kontzientziazio ekintza honetan parte hartzera.