Zientzia, teknologia, ingeniaritza eta matematika (STEM) arloak lantzeko aukera izango dute gazteek Getxon antolatu den Bizilabe ekimenean. "Esperimentatu, ikertu eta garatu sormena!" lelopean, parte-hartzaileek proiektu, esperimentu eta erronka berriak garatuko dituzte, arlo horietan adituak diren profesionalen laguntzarekin. Elhuyarreko Bizilabe programako arduradun Aitziber Lasak azaldu duenez, helburua da gazteak mundu profesionalera hurbiltzea eta zientziaren zein teknologiaren inguruko estereotipoak apurtzea, bereziki neskek ere etorkizuna arlo horietan irudikatu ahal izateko.
Zaloa Campillo Getxoko Udaleko zinegotziak nabarmendu du ekimenak aukera berriak zabaldu nahi dizkiela gazteei, "balio erantsi handiko ikasketak, lanbideak eta bizi-proiektuak" ezagutu ditzaten. Campillok azpimarratu du "teknologiak etorkizuna du, eta euskalduna, berdinzalea eta inklusiboa ere izan behar du", eta familiak animatu ditu seme-alabak Bizilaben izena ematera.
Jarduera 2026ko urritik 2027ko maiatzera bitartean burutuko da, Benta egoitzan (Maidagan kaleko 53. zenbakian). Saioak astelehenetan izango dira, eta bi ordutegitan aukeran: 17:00etatik 18:30era edo 18:30etik 20:00etara. Kuota arrunta 45 eurokoa da; familia ugarientzat edo guraso bakarreko familientzat 30 eurokoa; eta Diru-sarrerak Bermatzeko Errenta jasotzen duten familientzat 12 eurokoa.
Izena emateko lehen epea uztailaren 6ra arte egongo da zabalik, eta uztailaren 10ean jakinaraziko zaie onartutakoei matrikula egiteko argibideak. Bigarren epea uztailaren 7tik irailaren 22ra bitartekoa izango da, eta irailaren 23an emango zaie informazioa onartutakoei. Izen-ematea online egin daiteke Bizilaberen webgunean edo Udalak zabaldutako formularioaren bidez. Informazio gehiago [www.getxo.eus/euskara](http://www.getxo.eus/euskara) helbidean edo 94 466 00 10 telefonoan eskura daiteke.
