Getxoko alkateak, Amaia Agirrek, udalerriak datozen urteetarako erronka nagusiak argi dituela adierazi du. Horien artean, etxebizitza, gizarte-zerbitzuak, irisgarritasuna, auzoetako inbertsioak, kultura eta kirol ekipamenduen modernizazioa eta jasangarritasuna nabarmendu ditu. Udalaren arabera, jarduera horiek guztiak herritarren bizi-kalitatea hobetzea eta Getxo etorkizunerako prestatzea dute helburu nagusi.
Etxebizitzarako sarbidea lehentasun nagusietako bat da. Hiri Antolamenduko Plan Orokorrak 4.471 etxebizitza berri aurreikusten ditu, horietatik 3.044 babes ofizialekoak izango direlarik. Gainera, 18 eta 35 urte arteko gazteei zuzendutako alokairurako laguntzak eta Itzubaltzeta/Romoko etorkizuneko Belaunaldiarteko Zentroa aipatu dira; azken honek adinekoentzako egoitza eta gazteentzako 40 zuzkidura-bizitoki uztartuko ditu.
Gizarte-kohesioari dagokionez, Udalak 14,69 milioi euro mobilizatu ditu, 2025ean baino %12,65 gehiago. Etxez Etxeko Laguntza Zerbitzurako zuzkidura %23 handitu da, 3 milioi eurora helduz. Berdintasun-politikek, gaztelekuek, zahartze aktiboari lotutako programek eta gizarte-erakundeekiko lankidetzak ere baliabide gehiago izango dituzte. Horrez gain, Itzubaltzeta/Romoko Haurreskola berria irailean irekiko dela aurreikusi da, 0 eta 2 urte arteko haurrentzako 34 plaza publikorekin.
Irisgarritasunaren eta mugikortasunaren arloan, Udalak etorkizuneko Getxobusa garatzeko 450.000 euroko hasierako partida aurreikusi du, auzoen arteko lotura hobetzeko. Salsidu etorbideko arrapala mekanikoen modernizazio integrala ere lizitatu da, ia milioi bateko aurrekontuarekin. Bizikletak mailegatzeko udal-zerbitzua eta bidegorri-sarea indartzen jarraituko dute. Era berean, Areetako Kale Nagusia erdi-oinezko bihurtzeko lanak amaitzea eta hainbat auzotan espazio publikoa hobetzeko jarduerak jasota daude.
Jasangarritasunaren esparruan, Getxok Azkorri eta Larrañazubi bezalako naturaguneak babesteko eta klima-aldaketara egokitzeko neurriak bultzatzen jarraituko du, tartean Babesleku Klimatikoen Plana. Administrazioaren modernizazioari dagokionez, eraldaketa digitalerako 2,62 milioi euro bideratuko dira. Kulturaren eta kirolaren alorretan, Getxo Kulturak 14,66 milioi euro izango ditu, eta Getxo Kirolakek 18,88 milioi eurotik gora. Besteak beste, Punta Begoña Galeriak berreskuratzeko lanak, Villamonte Kultur Etxeko erreformaren bigarren fasea eta Fadurako atletismo eta errugbi harmailetako eraikinaren berritzea aurreikusi dira.
