Jaialdiak hiru gune nagusi izango ditu: Muxikebarri, Areetako Geltokia plaza eta Ereaga hondartzako aparkalekua. Muxikebarrin ordainezko kontzertuak izango dira, 20:00etan; doako emanaldiak, berriz, Areetako Geltokia plazan (13:00etan eta 18:00etan) eta Ereagako aparkalekuan (22:00etan) izango dira.

Ereaga izango da aurtengo hitzordu handienetako bi hartuko dituena. Irailaren 11n, ostirala, Celtas Cortos taldeak joko du, folk rockaren erreferenteetako batek, bere urteurreneko biran. Hurrengo egunean, irailaren 12an, larunbata, En Tol Sarmiento arabar taldeak zuzeneko indartsua eskainiko du.

Muxikebarri ko programazioak ere izen nabarmenak jasoko ditu. Irailaren 12an, Dulce Pontes fadista portugaldarra arituko da, 2021ean Getxon izandako arrakastaren ondoren.

Jaialdiari amaiera emateko, irailaren 13an, “Xalbador, Urepeleko artzaina” ikuskizuna eskainiko da Muxikebarrin. Proiektu honek Fernando Aire Etxart “Xalbador” bertsolari handia omenduko du, haren heriotzaren 50. urteurrenean, Joxan Goikoetxea musikari eta konpositorearen zuzendaritzapean.

Gainera, Getxo Folkek kaleko musikari ere lekua egingo dio. Areetako Geltokia plazan goizez eta arratsaldez izango diren doako kontzertuek musika tradizionala eta estilo askotariko proposamenak uztartuko dituzte.