Eusko Jaurlaritzako Segurtasun Sailak argitaratu ditu lehen aldiz Ertzaintzak eta udaltzaingoek batera zenbatutako arau-hauste penalen datuak. Guztira, 25.669 delitu erregistratu ditu Ertzaintzak eta 8.995 udaltzaingoek.

Delituen ia hiru laurdenak (%74) presentzialak izan dira, aurreko urteko lehen hiruhilekoan baino %2,1 gutxiago. Gainerako %26a delitu informatikoak izan dira, guztira 7.233 kasu.

Delitu presentzialen artean, ohikoenak ondarearen eta ordena sozioekonomikoaren aurkakoak dira, 19.532 arau-hauste penalekin. Horien artean, lapurretak dira ugarienak, 10.755 deliturekin, eta %5etik gorako jaitsiera izan dute.

Euskal poliziek 3.304 indarkeriazko lapurreta eta 3.103 indarkeria edo intimidazio bidezko lapurreta ere zenbatu dituzte, eta horiek ere jaitsiera txiki bat izan dute aurreko urteko aldi berarekin alderatuta. Estafek delitu guztien %20a osatzen dute. Estafa presentzialak apur bat igo dira, 701etik 749ra, eta informatikoak %8,9 jaitsi dira, nahiz eta ziberespazioan egindako delituen ia 10etik 9 mota honetakoak izan.

Delitu larrienen artean, 2026ko lehen hiruhilekoan lau hilketa zenbatu dira, 2025eko lehen hiru hilabeteetan baino bat gehiago. Halaber, 2.811 lesio-delitu eta sexu-askatasunaren aurkako 257 erregistratu dira.

2026ko lehen hiruhilekoan, Euskadin 3.325 pertsona atxilotu eta 10.467 ikertu dira. Horietatik, hurrenez hurren, %88 eta %75,8 gizonak dira. Atxilotu eta ikertutako pertsona guztien %39,6 autonomia-erkidegokoak dira.

Lurraldeka, Araban 5.811 arau-hauste penal erregistratu ziren, 1.000 biztanleko 17,21 delinkuentzia-tasarekin; Bizkaian 18.459, 15,97ko tasarekin; eta Gipuzkoan 10.394, 14,34ko tasarekin. Biztanle gehien dituzten hiriei dagokienez, Bilbo da 1.000 biztanleko delinkuentzia-tasa handiena duena, 23,84rekin; ondoren Donostia (20,44); Gasteiz (19,28); Irun (19,09); Barakaldo (17,75) eta Getxo (11).