Automotive Regions Alliance (ARA) erakundeak, Amorebieta-Etxanoko AIC-n egindako bileran, 'Bilboko Adierazpena' sinatzea adostu du. Testuak Europako industria politikan eskualdeek "funtsezko eginkizuna" izan dezaten aldarrikatzen du, baita automozio sektorean "Made in Europe" eta "tokiko edukia" sustatzea ere, emisioak murrizteko neutraltasun teknologikoa eta enpresen lehiakortasuna uztartuz.
Automobilgintzaren panoraman, elektrifikazioak hartu du nagusitasuna, eta Estatu Batuak eta Txina dira esparru horretan aurreratuenak. Europak, Mikel Jauregi Industria sailburuak adierazi duenez, ez du bere hamarkadetako "lidergo" posizioa galdu nahi. Epe labur eta ertainera, Txinako enpresen auto elektrikoen fabrikazio proiektuak Europan sartzea espero da, baina helburua da haien jarduera kontinentean ez mugatzea autoen muntaia hutsera.
“"Badakigu Txinako fabrikatzaileek autoak egingo dituztela Europan, baina tokian tokiko osagaiekin egin behar dute. Eta, gure kasuan, Txinako autoak euskal piezekin."
Jauregi sailburuak "emisioak murrizteko neutraltasun teknologikoaren beharra" aldarrikatu du, eta "auto elektrikoa hibridoekin eta erregai berriztagarriak erabiltzen dituzten autoekin uztartzea" eskatu du. Topaketan Nafarroako presidentea ere izan da, María Chivite.
Jauregiren esanetan, "Europako automobilgintzako eskualde nagusiek konpromiso bikoitza hartzen dute: Europako industria-oinarria gara eta Europa irekian sinesten dugu. Ongi etorria ematen diegu atzerriko automobilgintza-fabrikatzaileen ezarpenari Europan, baina joko-arau berdinak aplikatuz: tokiko edukia eta neutraltasun teknologikoa. Bilboko Adierazpenak aldarrikatzen du eskualdeek eginkizun protagonista izan dezaten Europako industria politikan; 'Made in Europe' eta tokiko edukiaren aldeko apustua automozio sektorean; eta, azkenik, neutraltasun teknologikoa emisioak murrizteko. Automobilgintzako sektore europarrago eta jasangarriago baten aldeko apustua da hori".
Testuinguru honetan, Adierazpenak Europako industria- eta inbertsio-tresnen diseinu eta ezarpen bateratua ere eskatzen du, automobilgintzako eskualdeekin batera. Halaber, talentuaren garrantzi estrategikoa azpimarratzen du, Lanpostu Onen Lan-Politikarako eta etorkizuneko Lanpostu Onen Legetarako helburuak babestuz, eta genero-berdintasuna sektoreko lan-politiken irizpide estruktural gisa integratuz.
