Javier Cortés, eLankidetzako zuzendaria, 'Emakumeak Martxan: mugikortasun gizatiarra eta emakumeen aurkako indarkeriak' kongresuaren inaugurazioan izan zen, azaroaren 9an eta 10ean Deustuko Unibertsitatean (Bilbo). Alboan eta unibertsitateak antolatutako ekitaldi honek, mugikortasun behartuan dauden emakumeen eskubideen defentsan euskal lankidetzaren konpromisoa azpimarratu du.
Kongresuak Afrika, Latinoamerika eta Europako erakunde sozial, erakunde publiko, unibertsitate eta entitateetako ordezkariak bildu zituen, migratu, errefuxiatu eta lekualdatutako emakumeei laguntzeko lan egiten dutenak. 'Emakumeak Martxan' programaren bidez, 2019tik Alboanek lagundutako esperientziak ezagutu ziren, hamar herrialde baino gehiagotan garatutakoak.
Jardunaldietan, migrazio-testuinguruetan emakumeek jasaten dituzten indarkeriak, bakearen eraikuntza, autonomia ekonomikoa eraldaketarako tresna gisa, zaurgarritasun handiko testuinguruetan programen ebaluazioaren erronkak eta lankidetza-sistemak ikuspegi feministatik eta giza eskubideetatik berraspentsatzeko beharra jorratu ziren.
eLankidetzarentzat, horrelako guneek berdintasunaren alde eta emakumeen eskubideen alde lan egiten duten erakundeen, gizarte-erakundeen eta nazioarteko eragileen arteko aliantzak sendotzen laguntzen dute. Era berean, lekualdatze behartuei eta genero-indarkeriei aurre egiteko lurraldeetatik eraikitako esperientziak eta erantzunak ikusgarri egiteko balio dute.
