Galdakaoko Santakurtzetako jaietarako egitaraua pixkanaka aurkezten ari da. Aurten, Nerea Ibarzabal, Unai Iturriaga, Alaia Martin eta Julio Soto bertsolariek parte hartuko dute irailaren 13an Kurtzeko plazan izango den Bertso Jaialdian. Arkaitz Estiballes galdakoztarra izango da gai-jartzaile.
Bestalde, Urreta kiroldegiko igerilekuak irailaren 1ean zabalduko dituzte berriro, udan egindako mantentze lanen ostean. Mantentze gimnasia, pilatesa, tonifikazioa eta aquagyma egiteko aretoak ere irekiko dituzte. Kardio eta fitness gune berria, berriz, urrian prest egotea aurreikusten da, eta azalera eta ekipamendu gehiago eskainiko ditu.
Azpiegitura berrien arloan, Galdakaoko Udalak eta Bizkaiko Foru Aldundiak Bekeako auzoa eta N-634 errepidea lotuko dituen zubi berri baten eta biribilgune baten proiektua idazteko kontratua esleitu dio Team Ingenieria y Consultoria SL enpresari, 285.000 euroan. Helburua da sarbidea hobetzea, bide segurtasuna handitzea eta Ibaizabal ibaiaren gaitasun hidraulikoa hobetzea. Proiektua 2027ko martxorako idatzita egotea espero da.
Gainera, Zuberoa kaleko espaloiak zabaltzeko eta zoladura berritzeko lanak hasi dira gaur, abuztuak 31. Hiru hilabetez luzatuko dira lanok, eta bitartean aparkalekuak mantenduko diren arren, kalerako sarrera Juan Bautista Uriarte kaletik desbideratuko da. Oinezkoen zirkulazioa uneoro bermatuko da.
Azkenik, joan den abuztuaren 7an Zubiaurretaurren kalearen inguruetan izandako sutearen ondorioz kaltetutako garajeetarako sarbidea berreskuratzeko lanak laster hasiko dituzte. Ertzaintzaren txostena jaso eta gero, hondakinak kendu eta eraikinaren egonkortasuna bermatzeko lanak egingo dira, auzotarrek datozen asteetan sarbidea berreskuratu ahal izateko.
Santakurtzetako jaietan, irailaren 11tik 20ra, kuadrillen arteko txapelketak izango dira protagonista. Aurten, Txapelketa Gastronomikoa berria izango da, bost proba gastronomikoz osatua, 16 urtetik gorakoentzat. Kuadrillen arteko XXIII. Txapelketak 37 proba izango ditu eta Gazte Txapelketak 9 proba 12 eta 16 urte bitartekoentzat. Izena emateko epea irailaren 2tik 9ra egongo da zabalik.
