Derioko Udalak Gernikako Arbola Kalea berrurbanizatzeko proiektuaren barruan, 16 zuhaitz kentzea aurreikusten du. Zuhaitz horiek Liriodendron tulipifera espeziekoak dira eta Uribe Parkearen ondoan daude. Obrak egitean sustraiei eragingo dietenez eta, ondorioz, ezin izango delako bermatu zuhaitzak egoera onean mantentzea, kentzea erabaki da.
Txosten teknikoaren arabera, egungo zuhaitzak tamaina txikiko banakako txorkoetan daude landatuta. Sustraiak haztean, zintarriak mugitu eta hautsi dira, eta zoladuran deformazioak sortu dira. Gainera, kota eta zoladura berriak egiteko lanek zuhaitzen sustraien zati handi bati eragingo lioke. Zuhaitz helduak lekuz aldatzeko aukera ere baztertu egin da, ateratzean sustrai ugari galduko liratekeelako eta ezin izango litzatekeelako bermatu behar bezala sustraituko direnik.
Kendu beharreko zuhaitzen ordez, parterre jarraitu bat egingo da, gutxi gorabehera 1,20 metroko zabalera eta metro batetik gorako sakonera izango duena. Landare-lurrez beteko da eta ureztatze automatikoko sistema izango du. Konfigurazio berri honek sustraiei hazteko lur-bolumen handiagoa emango die eta zoladuran eragin txikiagoa sortuko du.
Espazio horretan tamaina egokiko zuhaitz berriak landatuko dira. Espezieak aukeratzerakoan, Derioko klimara eta hiri-ingurunera ondo egokitzea, espaloiarekin bateragarriak izatea eta oinezkoentzako ibilbidean itzala emateko adaburu zabala garatzeko gaitasuna hartuko dira kontuan.
Jarduketa hau Gernikako Arbola Kalea, Sollube Kalearen eta Larrabarri Ibilbidearen artean berrurbanizatzeko proiektuaren barruan sartzen da. Proiektuak, besteak beste, espaloiak zabaltzea, bidegorri-zati berri bat egitea, Uribe Parkerako sarbidea hobetzea eta zoladura, argiteria, drainatze-sarea, hiri-altzariak, lorategiak eta seinaleztapena berritzea ere aurreikusten du.
