Kontzertu hau berezia izango da taldearentzat, Ania Guijarro baxujole eskoriatzarraren jaioterrian joko baitute. Dale Kaligula Berangon sortu zen 2021ean, lagun artean musika sortzeko asmoz. Hasierako formazioa Jon Ander Diaz (perkusioa), Ander Mollinedo (kitarra eta ahotsak), Alex Briegas (kitarra, sinte eta ahotsak) eta Jon Ander Ruiz (baxua) kideek osatzen zuten.

Jon Ander Ruiz Herbehereetara lanera joan zenean, Ania Guijarrok hartu zuen bere lekua, 2024aren amaieran. Guijarrok taldeko kideak aspalditik ezagutzen zituenez, ez zuen zalantzarik izan proiektu berri honetan parte hartzeko.

Formazio berri honekin, taldeak bere lehen LPa, Sasilanak, kaleratu zuen 2025eko azaroan, Bilboko Eten Espazio Sonoroaren eskutik. Disko honek soinu anitzak biltzen ditu, rock, pop, punk eta psikodelia uztartuz, beti ere euskaraz. Taldeak, umorez, 'psychopunk' gisa definitzen du bere estiloa, hamar abestiek genero bakarrean sailkatzea zaila egiten baitute.

Azken hilabeteetan, Dale Kaligula Bizkaian zehar ibili da diskoa aurkezten, kontzertuak eskainiz Berango, Leioa, Sopela, Santzurtzi eta Bilbo bezalako herrietan. Eskoriatzako emanaldia bereziki garrantzitsua izango da, orain arte etxetik urrunen joko duten kontzertua izateaz gain, Ania Guijarro baxujolearen jaioterria delako.