Astearte honetan aurkeztu da Estatuko sektore bioteknologikoaren erreferentziazko hitzordu hau, Bioenpresen Espainiako Elkarteak (AseBio) antolatuta, Bizkaiko Foru Aldundiarekin, Eusko Jaurlaritzarekin eta Basque Health Clusterrekin (BHC) lankidetzan. Antolatzaileek ekitaldiaren hazkunde jasangarria eta sektore bioteknologikorako berrikuntza, negozio eta talentuaren motor gisa duen garrantzi estrategikoa nabarmendu dute.
“"Biospain 2026 ekimenak bioteknologiaren sektoreko eragile nagusiak bilduko ditu Bilbon, lehiakortasuna sendotzeko, berrikuntza bizkortzeko eta autonomia estrategiko handiagorantz aurrera egiteko beharrak markatzen duen Europan sektorea sendotzeko une erabakigarrian."
Ekitaldiak ekosistemaren ikuspegi integrala eskainiko du, aurrerapen zientifikoak, erregulazio-erronkak eta negozio-aukerak aztertuz osasuna, bioekonomia edo foodtech-a bezalako arloetan, aliantza estrategikoak sortzea eta erakundeen arteko lankidetza sustatuz. Euskadi 2030 Industria Planak industria biosanitarioa estrategikotzat jotzen du, eta inbertsio-planeko tresnekin osatzen diren laguntza-tresnak hedatzen ditu.
Bizkaiarentzat, Biospain 2026 hartzea aukera estrategikoa da bere gaitasunak etorkizunerako erabakigarria izango den sektore batean proiektatzeko: biozientziak, bioteknologia eta osasun-teknologiak. Bizkaiak garrantzi berezia du bizitza- eta osasun-zientzien euskal ekosisteman, enpresen % 45, enpleguaren % 44 eta sektorearen diru-sarreren % 56 biltzen baititu Euskadin.
Biospain historikoki bi urtez behin egin izan da, eta 2026a urteroko ekitaldi moduan jarduten duen lehen edizioa da, sektorearen eskaera gero eta handiagoari erantzunez. Aurreko edizioan, Bartzelonan, 35 herrialdetako 2.400 parte-hartzaile baino gehiago bildu ziren. Euskadik etengabeko apustua egin du biozientzien eta bioteknologiaren alde 2002tik, batez ere osasunaren arloan, eta eskualdea bizitza- eta osasun-zientzien berrikuntzako Europako polo gisa finkatu da.
Biospain 2026 programak bioteknologiaren etorkizuna eratzen ari diren aurrerapen zientifiko, teknologiko eta arautzaileen ikuspegi integrala eskaintzen du. Agendak giza osasunean eta medikuntza pertsonalizatuan jarriko du arreta, terapia genikoetatik hasi eta adimen artifiziala I+Gn aplikatzeraino. Era berean, bioekonomia, nekazaritza jasangarria eta foodtech-a bezalako arloak landuko dira. Ekitaldiak nazioarteko adituak bilduko ditu eta negozio-aukerak eta networking-a sustatzeko espazio paregabea eskainiko du.
