Bingen Zupiria Segurtasun sailburua Eusko Legebiltzarrean agertuko da datorren asteartean, Eusko Legebiltzarreko Erakunde, Herritarren Partaidetza eta Segurtasun Batzordean, Loiuko aireportuan Global Sumud Flotillako kideen harreran izandako gertakarien inguruan beharrezko azalpenak emateko. Sailburuak adierazi duenez, "ahalik eta lasterren argitu nahi dira gertatutako istiluak eta sor daitezkeen erantzukizunak".
Lau pertsona atxilotu zituzten desobedientzia larriagatik, erresistentziagatik eta agintariari atentatu egiteagatik, larunbat arratsaldeko lehen orduan Loiuko aireportuan izandako istiluetan, Global Sumud Flotillako kideak iritsi zirenean.
Segurtasun Sailak azaldu duenez, iritsiera, "Ertzaintzari komunikatu gabea", Bilbon ospatzen ari diren errugbi finaletako zaleen joan-etorriekin bat egin du. "Kontzentratutako pertsona batzuen portaerak aireportuko irteera-gunetik ateratzen ziren pertsonen zirkulazio normala oztopatu du, Ertzaintzako agenteekin enfrentamenduak izan dituzte, eta hauek gomazko pilotak erabiltzera behartu ditu, baita bertaratutako pertsonen erresistentzia ere".
Sailak gogorarazi du "Europa osoan dagoen sentsibilitate testuingurua dagoela Flotillako kide desplazatuen legez kanpoko atxiloketaren eta jasan duten tratuaren inguruan".
Loiuko aireportuan gertatutakoaren ostean, Ertzaintzaren Barne Arazoetako Buruzagitza ikerketa bat egiten ari da "agenteen jarduna indarrean dauden argibideekin bat ote datorren egiaztatzeko". Gainera, Segurtasun Sailak poliziaren jardunaren eta gertatutakoen berri eman dio Euskal Autonomia Erkidegoko Poliziaren Kontrol eta Gardentasun Batzordeari.
Bingen Zupiria sailburuak, bere aldetik, agerraldi urgenterako eskatu du Eusko Legebiltzarreko Erakunde, Herritarren Partaidetza eta Segurtasun Batzordearen aurrean "beharrezko azalpenak emateko". Zehazki, asteartean bertan agertzea eskatu du, beste gai batzuk lantzeko deituta dagoen batzordea.
“"Ahalik eta lasterren argitu nahi ditugu gertatutako istiluak eta sor daitezkeen erantzukizunak."
Gertatutakoaren inguruan arduradunek damua agertu dute. Atxilotuei dagokienez, polizia-egoitzetan beharrezko izapideak amaitu ondoren, atxilotutako pertsonetatik bi aske geratu dira eta agintari judizialaren aurrera agertu beharko dute deitzen dietenean.
