Aurreko edizioarekin alderatuta %10eko hazkundea izan da, 883 hautagaitza jaso baitziren orduan. Startup hauek 1.297 proiektu aurkeztu dituzte, BINDen parte hartu duten Euskadiko 100 korporazio eta ETEen erronkei eta beharrei erantzuteko.
Aurkeztutako soluzioek industria- eta kudeaketa-prozesuak optimizatzea, energia-efizientzia hobetzea, ingurumen-inpaktua murriztea eta negozio-aukera berriak irekitzea dute helburu. Hautagaitzak aztertu ondoren, aurrera egiten duten startup-ek beren soluzioak aurkeztuko dituzte, erakunde bakoitzaren beharren arabera aztertzeko.
Azaroaren 26an hasiko da startup finalistek eta enpresek negoziatzeko fasea, proiektuak zehazteko. Hautaketa prozesua 2027ko apirilean amaituko da. Aukeratutako startup-ek proiektu pilotu ordainduak garatuko dituzte enpresa partner liderrekin batera, eta euskal industria- eta berrikuntza-ekosisteman murgiltzeko programa batean sartuko dira.
Programa honek networking-saioak, mentoretzak eta tailer espezializatuak biltzen ditu, startup-ei beren soluzioak balidatzen laguntzeko eta bezero potentzialekin harremanak ezartzeko. Emaitzak BIND Demo Day ekitaldian aurkeztuko dira, 2027ko uztailaren 1ean.
Aurten nazioarteko parte-hartzerik handiena izan da. Espainia da hautagaitza gehien dituen herrialdea (189), eta ondoren Italia, Frantzia, Alemania, Estatu Batuak, Ingalaterra eta Argentina datoz. Atzerriko hautagaitzak 777 dira, %80,4.
Euskal ekintzailetza teknologikoaren gorakada ere nabarmendu da: 66 startup euskaldunek aurkeztu dute hautagaitza (%13,8 gehiago). Horietatik 27 Gipuzkoakoak, 24 Bizkaikoak eta 15 Arabakoak dira.
100 enpresa partnerrek 11 erronka zehaztu dituzte lau esparrutan: industria adimenduna, antolamendu efizientea, energia eta jasangarritasuna, eta merkaturatzea. Startup bakoitzak hiru soluzio aurkez zitzakeen, eta 1.297 proposamen jaso dira.
Teknologia erabilienen artean, adimen artifiziala nabarmentzen da (703 startup), zereginen automatizazioan, mantentze prediktiboan eta optimizazio logistikoan erabilia. Horren atzetik datoz software-soluzioak, big data, IoT-a, eta Clean Tech eta Energy Tech teknologiak.
BIND industria adimenduneko berrikuntza irekiko plataforma publiko-pribatua da, Eusko Jaurlaritzak SPRI Taldearen eta Euskadiko ekintzailetza-ekosistemaren bitartez sortua. Gaur egun, Euskadiko 100 ETE, sozietate publiko eta enpresa nagusirekin dihardu elkarlanean.
Helburu nagusiak dira euskal industria-ekosisteman startupen garapena bizkortzea, enpresen lehiakortasuna sustatzea eta Euskadi industria-ekintzailetzako hub gisa kokatzea. 2016tik, 275 startup baino gehiago bultzatu eta 400 proiektu baino gehiago garatu dira.
