Bilboko Udaltzaingoak joan den ostiralean atxilotu zuen apirilaren 1ean Basaurin bikotekidea hil izana leporatzen dioten gizona. Atxiloketa indarkeriazko eta larderiazko lapurreta delitu baten ondorioz gertatu zen, eta epaile batek Basauriko Espetxe Zentroan sartzeko agindua eman du.

Bilboko Udalak jakinarazi duenez, atxiloketa ostiraleko 23:30 pasata izan zen Ribera kalean. Atxilotuari bi gizon jo izana leporatzen zaio, lapurreta egitean aurpegian kolpeak emanez.

Gainera, ostiral horretan bertan jarritako bigarren salaketa bat ere badu, ustez beste pertsona bati lesio larriak eragiteagatik. Agintari judizialak espetxean sartzeko agindua eman du, leporatzen zaizkion gertakari ezberdinen inguruko jarduketek aurrera jarraitzen duten bitartean.