Proiektu honek 4.500 metro koadro baino gehiagoko eremua hartuko du, eta hamabi hilabeteko iraupena izango du. Helburua da auzokideen beharrei erantzutea eta ingurunearen kalitatea hobetzea. Berritze lanek Kirikiño plaza bera eta Reyes Católicos, Irala, Zuberoa eta Lapurdi kaleak hartuko dituzte.
“"Plaza espazio moldakorrago, jasangarriago eta ingurumen-kalitate handiagoko gune gisa birpentsatzea da premisa."
Lanen artean, zoladura berritzea, iragazgaizte-sistema berriak ezartzea eta hiri-zerbitzuak egokitzea daude. Horrez gain, egonaldi-gune berriak, haurrentzako jolas-gune inklusibo berrituak, kalistenia praktikatzeko espazioak eta ekipamendu biosasungarriak gehituko dira. Plazaren azpian dagoen lurpeko aparkalekuak baldintzatzen du estalki baten eraikuntza, eguraldi txarra dagoenean plaza erabili ahal izateko, zimendatze arazoak direla eta. Hala ere, etorkizunean pergola bat eraikitzeko aukera aztertuko da, garajeak hartzen ez duen eremuan.
Bestalde, landaredia eta zuhaitzak indartuko dira aire zabaleko jarduerak sustatzeko. Kaleei dagokienez, Kirikiño etorbidean espaloiak zabalduko dira, zoladura berrituko da eta oinezkoen joan-etorria hobetuko da. Aparkalekua ere aldatuko da, baterian zegoena lerroko aparkaleku bihurtuz. Etorbide horretan bertan, Irala kalearekin lotuko duen igogailu berria lizitatuta dago jada.
Ekintza guztien bidez, ingurune irisgarriagoa bultzatuko da, herritar guztientzat egokiak diren ibilbideak sortuz, arrapala berriekin eta elementu egokituekin. Kontuan izan behar da plazak %2ko malda duela Kirikiño etorbiderantz, eta Reyes Católicos kaleak, berriz, %8ko malda duela Irala kaleraino.
