Euskadik Basqu e Zirkular Metals proiektua bultzatuko du, Europako altzairugintzaren industria zirkularrean buru izateko xedearekin. Ekimenaren helburua da lurraldea altzairuaren eta metalen eraldaketa zirkularrean lider diren Europako eskualdeen artean kokatzea, euskal industriaren autonomia estrategikoa, funtsezko materialetarako sarbidea eta berritzeko ahalmena indartuz.
Proiektuak sei industria-sektoretan jardungo du: siderurgia, automobilgintza, mugikortasun jasangarria, energia eolikoa, fabrikazio aurreratua eta eraikuntza. Guztira, 25 milioi euro inguru mobilizatzea espero da, eta 11 lider industrial, 5 kluster industrial eta Zientzia, Teknologia eta Berrikuntzaren Euskal Sareko eragileak bilduko ditu.
Helburua da balio erantsi handiagoko eta karbono urriko produktu metalikoetarantz aurrera egitea, lehengaiekiko kanpoko mendekotasuna murriztea eta Europako zirkulartasun- eta deskarbonizazio-exijentzia berriak betetzea. Horretarako, kalitatezko txatarrerako sarbidea, hobekuntza teknologikoa, materialen trazabilitatea, ekodiseinua eta negozio-eredu berriak landuko dira.
2026ko lehen mugarri nagusia Euskadin Produktuaren Pasaporte Digitala abian jartzea izango da, altzairuaren, aluminioaren eta beste produktu metaliko batzuen trazabilitate digitalera behartzen duen Europar Batasunaren eskakizunari erantzunez.
Mikel Jauregi, Eusko Jaurlaritzako Industria, Trantsizio Energetiko eta Jasangarritasuneko sailburuak, proiektua aurkeztu du, Euskadi 2030 Industria Planaren barruan. Plan honetako 25 proiektuetatik hamaseigarrena da hau, eta hamargarren lidergo publikokoa.
Altzairua eta metalak Euskadiko eredu industrialaren gune historikoaren parte dira, eta jarduera ekonomikoan pisu erabakigarria dute, industriako balio erantsi gordinaren %49 izanik eta 110.000 enplegu baino gehiago biltzen dituztela.
Proiektuak industria-lehiakortasuna indartzea, material estrategikoetarako sarbidea ziurtatzea eta berrikuntzarako, inbertsiorako eta kalitatezko enplegurako aukera berriak sortzea du helburu. Horrela, Euskadi altzairuaren eta metalen eraldaketa zirkularrean lider diren Europako eskualdeen artean kokatu nahi da.
Parte hartuko duten eragileen artean daude ArcelorMittal Sestao, Sidenor, Grupo Tubacex, Gescrap, CAF, Gestamp, Gamesa Gearbox, Haizea Wind Group, Viuda de Sainz, Etxetar eta FMD Carbide, baita BRTA, EHU, TKNIKA eta Siderex, AFM, Buid:INN, Acicae eta Aclima klusterrak ere.
