Eusko Jaurlaritzak eta Europako Batzordeak beren lehentasun nagusiak partekatu dituzte gaur goizean Bilbon, garapen jasangarriaren eta politika sozialen arloan. Lan-jardunaldi honetan, Euskadiren jardun-ildo nagusiak aztertu dira, baita datozen urteetarako erronka nagusiak ere.
Asier Aranbarri, Berrikuntza Sozialaren eta Agenda 2030aren zuzendariak, Europako Batzordeko ordezkariekin partekatu ditu Jaurlaritzaren ekintza-ildo nagusiak, bereziki gobernantza demokratikoan, berrikuntza sozialean eta garapen jasangarrian zentratuta. Era berean, Agenda 2030aren bultzada eta eragile eta erakundeekin lankidetza azpimarratu ditu, gizarte-erronkei erantzuteko.
Topaketa hauetan parte hartu dute, halaber, Ekonomia, Lan eta Enplegu Sailaren eta Gizarte Ongizatearen, Gazteriaren eta Erretem Demografikoaren Sailaren ordezkariek. Horrela, Euskadiren erronka sozial eta ekonomikoei aurre egiteko ikuspegi zabala landu da.
Jardunaldian izan dira, baita ere, Marian Răduţă, Europako Batzordeko Enplegu, Gai Sozial eta Inklusio Zuzendaritza Nagusiko (DG EMPL) unitateko buruordeak Espainia eta Maltarako, eta Ricardo Fernández Caballero, Espainiarako Programa Laguntzailea.
Euskadiren eta Europako Batzordearen arteko elkarrizketa instituzionala indartu da topaketa hauen bitartez, gizarte-, ekonomia- eta garapen jasangarriaren erronken inguruan.
