Topaketak Basaurin bildu zituen udal ordezkariak, auzo-elkarteak eta mugikortasunaren arloko adituak. Saioaren helburua hiri-espazioak bizigarriagoak egiteko estrategiak partekatzea izan zen, autoen presentzia murriztuz eta oinezkoen arteko harremanak sustatuz.
Bizkaiko Foru Aldundiko mugikortasun zuzendariak Bizkaibizi zerbitzuaren ezarpena iragarri zuen udalerrian. Guztira 8 geltoki jarriko dira, besteak beste, Basozelain, udaletxearen inguruan eta San Migeleko Ixatxak parkean. Zerbitzuaren finantzaketa eredu berriak Aldundiaren gain hartuko du kostu osoa.
Bide-segurtasunaren inguruan, Stop Violencia Vial erakundeak azpimarratu zuen mugikortasun jasangarria ezin dela segurtasunik gabe ulertu. Istripuak prebenitzeko bide-hezkuntzaren garrantzia eta zirkulazio-abiadura 30 km/h-ra murriztearen beharra nabarmendu zituzten, oinezkoen babesa bermatzeko.
