Udal gobernu taldeak oposizioko taldeei aurkeztu dien aurrekontu zirriborro berriak ia 151 milioi euroko kopurua jasotzen du. Dokumentu honek aurreko zirriborroan Pertsonal Arloan atzemandako akatsak zuzentzen ditu, eta horiek eragotzi dute orain arte udalak bere kontuei argi berdea ematea.
Aurrekontu zirriborro berria bi ardatz nagusitan oinarritzen da: pertsonak eta udal zerbitzuen indartzea. Oposizioko taldeek hilaren 22ra arteko epea dute dokumentu honi zuzenketak aurkezteko. Zuzenketa horiek aztertu ondoren, osoko bilkuran kontuen eztabaidaren aurreko batzordea egingo da.
“"Udalkutxaren ekarpena nabarmentzen dugu, 83,48 milioitik 89,46 milioira igarotzen baita."
Zehazki, aurrekontu zirriborroak 150,8 milioi euroko zuzkidura aurreikusten du. Diru-bilketaren igoera horri esker, 47,8 milioi euroko partida bideratuko da inbertsioak egiteko eta udalak eskaintzen dituen zerbitzuei eusteko. Partida horrekin, hiriko kale garbiketa eta zabor bilketa zerbitzu berria finantzatu ahal izango dira, baita Arrontegi auzoko Bizkaia kalean arrapala mekanikoak sortzeko proiektua ere. Gainera, partida honekin, Barakaldoko auzo bakoitzari estalitako jolas-gune bat emateko helburuan aurrera egingo da.
Halaber, Kultura, Euskara eta Drogamenpekotasunen Prebentzio udal arloak 20,3 milioi euroko zuzkidura izango du, azken kontuetan baino 2,5 milioi euro gehiago. Arlo honetako proiektu nabarmenetako bat Bagatzako kulturgune berria martxan jartzea izango da, eta herriko jai nagusietarako aurrekontua handitzeko ere balioko du.
Udal kontu horiek Usoa Tailerrari zuzendutako partida nabarmen igotzea ekarriko dute, tailer horrek 14,3 milioi euroko zuzkidura izango baitu, azken kontuetan baino %9,7 gehiago. Gainera, 7,4 milioi euro bideratuko dira Eretza udal etxebizitza sozietatera, lau milioi Inguraldera, eta udal euskaltegiak hiru milioi euroko aurrekontua izango du. Azkenik, Barakaldo Antzokiak 1,3 milioi euroko aurrekontua izango du, herria arte eszenikoen munduan erreferente izaten jarrai dezan.
