Arrigorriagako Udala k aurrera darrai Hegoaldeko Saihesbidearen trazatuaren aurkako ekintzetan. Helburu horrekin, lantalde bat bildu da proiektuaren inguruko azken berriak aztertzeko eta udalerri gisa irizpideak bateratzeko. Topaketara tokiko alderdi politiko guztiak, udal-teknikariak, Ingeotyc enpresako ingeniariak eta auzotarrak bertaratu dira, nagusiki "Arrigorriagaren interesak defendatzea" helburu zutela adierazi dute udal iturriek.
Bilera horretan, eta Maite Ibarra alkatearen presentziarekin, iragarri zen hurrengo astean alkateak Susana García Chueca Eusko Jaurlaritzako Mugikortasun Iraunkorreko sailburuarekin bilduko dela. Bertan, udalerriaren alternatibak eta eskakizunak zuzenean helaraziko dizkio: "Trazatuaren aldaketa edo trenbideen lurperatzea nahi dugu".
Gobernu taldeak gogorarazi du proiektuaren gauzatzeak merkantzien trenbide-garraioaren igoera esanguratsua ekarriko duela udalerrian, "15 minuturo tren bat, egunean 96, bidaiari-trena kontuan hartu gabe. Horrek zaratak eta bibrazioak areagotuko ditu, eta auzotarren ongizateari, atsedenari eta osasunari eragingo die".
Egoera honen aurrean, hainbat bizilagunek ekainean Eusko Legebiltzarrean agerraldia egiteko asmoa dute. Horrez gain, Udalak Madrilen presioa egiteko konpromisoa hartu du. Ildo horretan, alkateak behin baino gehiagotan eskatu dio bilera Francisco Javier Sánchez Ayala Espainiako Gobernuko Plangintza Ferroviarioko zuzendariordeari, Arrigorriagako bizilagunen ahotsa entzuten jarrai dadin eskatzeko.
Saioan, Udalak eta herritarrek espazio horietan eramango duten jarrera landu da batera, guztiz sinkronizatuta joateko eta Arrigorriagaren interesak ahots bakarrez defendatzeko.
