Zientzia eta Artea lelopean, jaialdiak diziplina ugari bilduko ditu, inklusibitatea oinarri hartuta. Helburua da dibertsitate funtzionala edo kognitiboa duten pertsonengana eta egoera soziosanitarioan dauden kolektiboengana iristea.
Bilboko Bizkaia Aretoan egindako inaugurazioan parte hartu dute Estitxu Garai, EHUko Bizkaiko Campuseko eta Komunikazioko errektoreordeak; Gotzone Barandika, EHUko Transferentzia eta Nazioartekotze errektoreordeak; Itziar Urtasun, Bilboko Udaleko Berdintasun eta Jaietako zinegotziak; Maialen Agirre, Eusko Jaurlaritzako Berrikuntza zuzendariak; eta Nerea Jauregizar, EHUko Ikerketa Gizarte Dibulgazioko zuzendariak.
Zientzia Asteak 100dik gora jarduera antolatu ditu doan adin guztietako ikusleentzat lau egoitzetan. Guztira, 40 txoko eta 62 tailer baino gehiago eskainiko dira, non EHUren ikerketa-lana ezagutu ahal izango den. Horrez gain, 12 ibilbide didaktiko, 13 erakusketa, 14 hitzaldi, 28 Zientzia Clubeko bakarrizketa eta hainbat ikuskizun ere izango dira. Tailer eta ibilbide didaktiko batzuetan oraindik plaza libreak daude; izena emateko Zientzia Astearen webgunean egin daiteke. Gainerako jardueretan, sarrera librea izango da aforoa bete arte.
Bilbon, azaroaren 3tik 8ra, 33 tailer, 21 txoko, 4 ibilbide didaktiko, 10 hitzaldi, 8 erakusketa eta "Zientzia eta Arte" gaiarekin lotutako hainbat ekitaldi antolatu dira. Besteak beste, parte-hartzaileek ezagutu ahal izango dute nola sortzen eta erabiltzen duen adimen artifizialak hizkuntza, zer zientzia dagoen pinturan erabiltzen diren koloreen atzean, nola erabil daitezkeen biomaterialak modan eta artean, eta zianotipiaren bidez itsasoko biodibertsitatea nola irudika daitekeen. Zientzian emakumeen ikusgarritasuna bezalako gaiak ere jorratuko dira, SheMentoring txokoan. Bestalde, Itsamuseumean bisita daitekeen Secretos de la costa vasca: de la ciencia al arte erakusketa eta Micromundos, micología y medicina a través del lenguaje del arte lana nabarmendu behar dira. Aurten, Zientzia Clubeko bakarrizketa ikuskizunak zortzi ikertzaile hartuko ditu Bizkaia Aretoan.
Gasteizen, azaroaren 4tik 8ra, 18 tailer, 9 txoko, 4 ibilbide didaktiko, 3 erakusketa eta hainbat hitzaldi antolatu dira. Bibat Museoan, farmaziarekin, ikerketa forentzarekin eta magia eta fisika uztartuko dituzten jarduerekin lotutako tailerrak egingo dira. Artearen eta zientziaren arteko bi erakusketa ere bisitatu ahal izango dira. Fernando G. Baptista. El explorador de la infografía científica lanak National Geographic Magazine aldizkariko infografiaren editore seniorraren lanak bilduko ditu. Oceanus Plasticus erakusketan, berriz, itsasoko kutsadurak sortutako "munstroak" irudikatzen dituzten izaki irudikariak ikusi ahal izango dira. Azkenik, Zientzia Clubeko ekitaldian zazpi ikertzailek umorea eta zientzia uztartuko dituzte beren bakarrizketetan.
Donostian, azaroaren 4tik 7ra, 11 tailer, 12 txoko, 4 ibilbide didaktiko eta 2 erakusketa eskainiko dira. Gipuzkoako txokoan, Eduardo Chillida eskultoreari eskainitako espazioa interesgarria da, Grafías de arquitectura: Chillida Leku erakusketaren bidez. Era berean, arkitektura marrazketa jarduera eskainiko da, non 26 arkitektura-ikaslek Chillidaren unibertso eskultorikoa nola berrinterpretatzen duten erakutsiko dieten bisitariei. Halaber, Leonardo DaVinci artistaren lanek ere izango dute lekua Donostian. New Yorkeko arte-restauratzaile ospetsuak, Dianne Modestini, eta DIPCko ikertzaile Juan Manuel García-Ruiz ek El Salvator Mundi bajo la mirada de la ciencia hitzaldian lan horren egiletza jorratuko dute. Bestalde, Donostiako Zientzia Clubak bost bakarrizketa hartuko ditu, besteak beste, 3D inprimaketari, kirolari, arteari eta gasen zientziari buruzkoak.
Barakaldoko Clara Campoamor Gizarte Etxeak ere hartuko du Zientzia Clubeko ekitaldia, zortzi monologista bilduz. Guztira, Barakaldon 8 txoko, 21 tailer, 8 erakusketa, 3 ikuskizun, ibilbide didaktiko bat eta hitzaldi bat eskainiko dira. Txokoetan eta tailerretan, errealitate birtuala, robotika, 3D inprimaketa eta beste hainbat gai jorratuko dira. Horrez gain, Hielo & Fuego eta Magia, arte y ciencia ikuskizunek animazio-jarduerak eskainiko dituzte ikasleentzat eta familientzat.
Hezkuntza-zentroen parte-hartzea: Publiko orokorrari zuzendutako programazioaz gain, aurten ere, Derrigorrezko Bigarren Hezkuntzako eta Batxilergoko ia 4.600 ikaslek bisitatuko dituzte txokoak eta tailerrak. Aurreko edizioen harrera ona eta gero eta eskaera handiagoari erantzuteko nahia ikusita, Zientzia Asteak hezkuntza-zentroentzat antolatutako jarduerak egun bat lehenago hasi dira.
Babesleak eta kolaboratzaileak: Ekintza guzti hauek gauzatzeko, EHUren antolakuntzak hainbat erakunde eta eragileren laguntza eta babesa du. Zientzia Astea Eusko Jaurlaritzako Zientzia, Unibertsitate eta Berrikuntza Sailarekin elkarlanean antolatzen da, eta Araba eta Gipuzkoako foru aldundien, Bilbo, Barakaldo, Donostia-San Sebastián eta Vitoria-Gasteizko udalen, Vital Fundazioaren eta ecampusen babesa du. Era berean, jarduera batzuk G9EU4RESEARCH proiektuaren barruan kokatzen dira. Ekimen hau, Unibertsitateen G-9 Taldeak sustatua, Europako Batzordeak finantzatzen du Marie Skłodowska-Curie Ekintzen (MSCA) bidez. Ekimen honen helburua Europan ikerketa-ibilbideak sustatzea da eta Horizonte Europa, Europar Batasunaren ikerketa eta berrikuntza programaren barruan kokatzen da.
