Alfonso Zapico, historietista, ilustratzaile eta irakaslea, 2012an Dublinés lanagatik Komiki Sari Nazionala jaso zuena, Basauriko San José Ikastetxeko DBHko 4. mailako ikasleekin bildu da gaur. Bertan, 2008an argitaratutako Café Budapest komikiari buruz hitz egin du, zeinak gaurkotasun handia duen oraindik ere, deskribatzen dituen gertaerengatik, hots, arabiar-israeldar gatazkagatik.
Eleberri grafiko honek Yechezkel Damjanich biolin-jotzaile judu gaztearen istorioa kontatzen du, 1947ko Budapest desolatuan amarekin bizi dena. Jerusalemdik osaba Yosefek bidalitako gutun bat jasotzen du. Miseriatik ihesi, Yechezkel eta bere ama Palestinara iristen dira une politiko nahasi batean, ingelesek eskualdea utzi baino lehen. Osaba Yosefek Café Budapest izeneko lokal bitxi bat zuzentzen du Hiri Zaharretik gertu, non juduak, arabiarrak eta mendebaldekoak elkarrekin bizi diren. Lokal hau gudu-zelai txiki bihurtzen da, Palestina osoan dagoen kaosa eta basakeria islatuz, ingeles kolonia izateari uztean lehertzeko zorian. Pasarte honek Israelgo Estatuaren sorrera eta Protektoratuaren lurralde-banaketa ekarri zituen, bi herrien arteko gatazka luze baten hasiera markatuz.
“"Komikia tresna pedagogiko gisa defendatzen dut, komikiek ere irakasten dute."
Ikasleek arretaz entzun diote egileari, eleberriaren sorkuntza prozesua eta ideia nola sortu zen azaldu baitie. Zapicok azpimarratu duenez, dokumentazio lan handia egin zuen istorioa ondo girotzeko, irakurleari sinesten eta barneratzen laguntzen diolako. Gainera, lan grafikoetan aritu nahi duten ikasleei esan die lehenik idatziko duenari buruz pentsatzen duela, gero istorioa kapitulutan zirriborratzen duela eta, azkenik, marraztu aurretik elkarrizketak idazten dituela. Testua dela garrantzitsuena azpimarratu du.
Basauriko San José Ikastetxeak ia hamarkada bat darama hezkuntza jarduera hau garatzen, komikiak eta eleberri grafikoak irakurtzean datzana, hainbat irakasgaitako gaietara egokituta, beren prestakuntza osatzeko tresna didaktiko gisa erabiltzeko. Alfonso Zapicori harrigarria iruditu zitzaion hori, eta adierazi duenez, 2027an Café Budapest antzerkira egokituko da.
