Proiektuaren helburua gazteen ongizatea sustatzea eta beraien ingurunean babes sare komunitarioa indartzea da. Horretarako, Arakaldo, Arrankudiaga-Zollo, Arrigorriaga, Etxebarri, Galdakao, Orozko, Ugao-Miraballes, Orduña, Zaratamo eta Zeberioko gazteei zuzenduta dago.
Azken urteetan nabarmen areagotu dira gazteen artean osasun mentaleko arazoak, desoreka emozionala eta nahigabeko bakardadea. Egoera honi erantzuteko, Gazteak Saretzen proiektuak prebentzioa, goiz detekzioa eta laguntza emozionala uztartzen ditu.
Talde profesional batek garatuko du proiektua, esku-hartze sozioedukatiboan, lan komunitarioan eta gizarte komunikazioan esperientzia duena. Gazteen eguneroko bizitzako guneetan gauzatuko da esku-hartzea: ikastetxeetan, gaztegunetan, kirol eta kultura guneetan, kalean eta lokaletan, besteak beste. Helburua gazteen ondoan egotea, inguruan dituzten eragileekin elkarlanean aritzea eta denboran laguntza beharrak identifikatzeko aukera emango duten sare komunitarioak sortzea da.
Horretarako, udalerri bakoitzean baliabideen mapa bat landuko da eta erreferente komunitarioak (hezitzaileak, irakasleak, entrenatzaileak, familiak...) identifikatuko dira gazteekin harreman zuzenean daudenak, "komunitateko antenak" izan daitezen. Pertsona hauek sentsibilizatu eta, hala badagokio, gaiaren inguruan formatuko dira, herri bakoitzean gazteen ongizate emozionalarekiko sentsibilitatezko sare bat sortzeko.
Gazte bakoitzaren egoera eta beharrak kontuan hartuta, aktiboki entzuteko aukera eta hurbileko laguntza eskainiko da, eta beharrezkoa denean, pertsona bakoitzarentzako baliabide egokiena bilatzen eta bertara iristen lagunduko zaio. Prozesu osoan zehar, konfidentzialtasuna, ongizate emozionala eta gaztearekin konfiantza harremana izatea izango dira funtsezkoak. Horrez gain, berdinen arteko laguntza taldeak antolatuko dira bakardade sentimendua arintzeko eta gazteen arteko loturak indartzeko.
Proiektuak bere komunikazio eta sentsibilizazio kanpaina propioa izango du gazteak aurkitzen diren kanaleetan: Instagram, TikTok eta webgunea, besteak beste. Kanpainaren helburua desoreka emozionalaren eta nahigabeko bakardadearen inguruko estigmak haustea, gai horiei naturaltasunez hitz egitea eta behar denean laguntza eskatzera animatzea da. Mezuak eta ikus-entzunezko piezak hainbat herritako gazteekin sortu eta kontrastatuko dira, beraien hitza eta bizipenak erdigunean jarriz.
Ekimen honekin, Bizkaiko Foru Aldundiak, Nerbioi-Ibaizabalgo Mankomunitateak eta Galdakaoko Udalak prebentzioa eta komunitatearen inplikazioa sustatu nahi dituzte gazteen ongizate emozionalaren alde, beren ingurunean entzunak, ulertuak eta lagunduak senti daitezen.
