Euskadik bere potentzia bioteknologikoa aurkeztu du Europako sektorean, Bilbao Exhibition Centren (BEC) ospatzen ari den BIOSPAIN 2026 Bioteknologiaren Nazioarteko Topaketan. Azoka irailaren 29tik urriaren 1era arte luzatuko da, eta Bizkaiko Foru Aldundiaren, Eusko Jaurlaritzaren eta Bioenpresen Espainiako Elkartearen (AseBio) lankidetzari eta Basque Health Clusterren babesari esker antolatu da.
BioSpainek sektore bioteknologikoko enpresak, erakundeak, agentzia erregulatzaileak eta inbertitzaile nagusiak biltzen ditu, biotech industriaren garrantzia estrategikoa azpimarratuz osasunean, elikaduran, bioekonomian eta industria-trantsizio berdean.
Azokaren inaugurazioan parte hartu dute Ainara Basurko Bizkaiko Foru Aldundiko Ekonomia Sustatzeko foru-diputatuak, Jaione Ganzarain Eusko Jaurlaritzako Teknologia, Berrikuntza eta Eraldaketa Digitaleko sailburuordeak eta Cristina Nadal AseBioko presidenteak. Ekitaldian izan zen, halaber, Juan Cruz Cigudosa Zientziaren, Berrikuntzaren eta Unibertsitateen Estatu idazkaria.
Euskadin egin zen lehenengo ediziotik hamar urtera, BIOESPAIN bizitzaren eta osasunaren arloko zientzien ekosistemarik finkatuenetako batera itzuli da. Gaur egun, Euskadik 300 enpresa, 20 ikerketa- eta teknologia-zentro, lau unibertsitate eta erreferentziazko ospitaleak ditu, eta bere ekosistema biosanitarioak 9.400 milioi euro baino gehiago eta 62.000 enplegu zuzen sortzen ditu.
Euskadiko administrazio publikoek egindako apustu irmoaren eta lankidetza publiko-pribatuaren emaitza da errealitate hau. Gainera, Euskadiko Industria Plana 2030 eta Zientzia, Teknologia eta Berrikuntzako Plana, Euskadi 2030 -ZTBP 2030- plan orokorrez gain, lurraldeko foru-aldundiek ere estrategia espezifikoak ezarri dituzte biozientziei eta deeptechari laguntzeko.
Ekosistema honetan, Bizkaiak du rol garrantzitsuena, Euskadiko enpresen %45, enpleguaren %44 eta sektoreko diru-sarreren %56 kontzentratzen baititu. BIOSPAIN Bilbon egiteak aukera ematen du Euskadiko hiru lurraldeetako bioteknologiaren posizioa indartzeko eta gaitasun zientifikoak eta enpresarialak konektatzeko.
Erresuma Batua da BIOSPAIN 2026ko herrialde gonbidatua, eta horrek topaketaren nazioarteko dimentsioa eta Europako ekosistema bioteknologiko dinamikoenetako biren arteko konexioa indartuko du. Aliantza berriak sustatuko dira ikerketaren, berrikuntzaren eta inbertsioaren arloetan.
Inaugurazioan, Ainara Basurko diputatuak azpimarratu du Bizkaian sektoreak 135 enpresa baino gehiago biltzen dituela, 27.000 enplegu baino gehiago sortzen dituela eta 5.200 milioi euroko diru-sarrerak gainditzen dituela. Jaione Ganzarain sailburuordeak Euskadiko industria biosanitarioaren indarra eta Euskadiko Industria Plana 2030 nabarmendu ditu, lankidetza publiko-pribatuan oinarritutako Proiektu Eraldatzaileen garrantzia azpimarratuz.
Cristina Nadal AseBioko presidenteak adierazi du bioteknologia une erabakigarrian dagoela Espainian eta Europan, eta BIOSPAIN 2026 erronkak jorratzeko eta aliantzak sortzeko espazioa izango dela.
Ceri Morgan Erresuma Batuko ordezkariak azaldu du herrialde gonbidatuak pabilioi bat izango duela eta networking jarduerak eta mahai-inguruak antolatuko direla, besteak beste, Horizon Europe programaren inguruan.
BIOSPAIN 2026ko programa lau arlotan egituratu da: Policy, Health, Bioeconomy eta Finance & Investment. Horietan, bioteknologiaren etorkizuna definitzen ari diren aurrerapenak eta erronkak jorratuko dira, hala nola Europako lehiakortasuna eta autonomia estrategikoa indartzea, araudia egokitzea eta berrikuntza babestea. Biotech Actek protagonismo berezia izango du.
Gainera, Javier Padilla Osasuneko Estatu idazkaria, Raquel Yotti Abangoardiako Osasunerako PERTEren ordezkaria, Thomas Van Cangh DG SANTEko Deputy Head of Unit eta Miguel Gómez-Pavón López Industria eta Turismoaren Ministerioko zuzendaria, besteak beste, eztabaida horietan parte hartuko dute.
BIOSPAINek enpresak, inbertitzaileak, ikerketa-zentroak eta erakundeak konektatzeko balio du. [Partneringeko plataformaren](https://biospain.com/partnering/) bidez, aldebiko bilerak hitzartu daitezke etorkizuneko akordioak eta proiektuak egiteko. Bartzelonako azken edizioan 4.500 bilera egin ziren.
BIOSPAIN 2026ren azken egunean egingo den [Talent Day](https://www.b2bmatch.com/e/talent-day-20226) ekitaldiak ikasleak, ikerlariak eta profesionalak sektore bioteknologikoko enpresekin eta erakundeekin konektatzeko aukera emango du, talentuaren garapen profesionalari eta enplegu aukerei buruzko saioekin.
