Bihar, urriaren 29an, Jokoarekiko Adikzioen Aurkako Munduko Eguna dela eta, Bilboko Udaleko Osasun eta Kontsumo Arloak informazio-gune bat jarriko du Plaza de las Mujeres-en (Bailén kalea), 10:00etatik 15:00etara. Ekimen honen helburua jokoarekiko adikzioen prebentzioa indartzea eta Bilbon adikzio prozesuak dituzten pertsonei eta haien familiei laguntzen dieten baliabide eta laguntza-taldeen ikusgarritasuna areagotzea da.
Jokoarekiko adikzioen aurkako ekintzak Bilboko Udalaren VI. Tokiko Adikzioen Planaren barruan kokatzen dira. Plan honen helburua da drogen gehiegikeriak eta apustu-jokoak murriztea, baita adikzio-jokabideekin lotutako ondorio negatiboak ere. Planaren baitan, Osasun eta Kontsumo Arloak osasunaren sustapenerako jarduerak egiten ditu biztanleria orokorrarentzat zein biztanleria espezifikoarentzat.
Informazio-gunean, Alubiz Bilbao Elkartearen laguntza izango da. Elkarte hori ludopatia izan duten pertsonek eta haien senideek osatzen dute, eta beren esperientzia modu altruistan partekatzen dute. Jardunaldi honetan, "¿Te preocupan las adicciones? Caminamos contigo hacia una vida más saludable" izeneko liburuxka zabalduko da, Bilbon dauden baliabide asistentzialak eta elkarren laguntza-taldeak ezagutarazteko.
Euskal Autonomia Erkidegoko biztanleen %1,5ak jokoarekiko arazoren bat duela kalkulatzen da, hau da, 28.000 pertsona inguru. Jokoarekiko adikzioak, bereziki online jokoak eta apustu digitalak, kezka berezia sortzen dute gazteen artean. Biztanleen %92,8ak adierazi du inoiz jokatu duela bere bizitzan, eta %85,8ak azken 12 hilabeteetan.
