Ordiziako Alde Zaharreko jaiek ospe handia hartu dute azken urteotan, herriko ostalarien ekimenez eta Udalaren, merkatari elkartearen eta beste talde eragile batzuen laguntzarekin antolatuta. Aurten ere, Ordizia urteko asteburu animatuenetako bat bizitzeko prestatzen ari da, herrigunea kulturaz eta jai giroz blaituz.

Asier Aseginolaza antolatzaileak adierazi duenez, ilusio handiz ari dira lanean, nahiz eta kezka puntu bat ere baduten. Izan ere, aurtengo edizioa Realaren Kopako finalarekin bat etorriko da. Egoera hori «alde biko lantza» izan daitekeela azaldu du: herritar asko kanpoan egongo dira, baina, aldi berean, Gipuzkoa osoan festa giroa izango da partidaren bueltan.

Jai herrikoiaren aldeko apustua egin dute, eta hainbat taldek hartuko dute parte. Emaneurrek photocalla jarriko du asteburu osoan Zuhaiztian, Ordiziarrockek musikariekin lagunduko du, eta Burrunbazale txaranga alde zaharreko kaleak girotzen arituko da egun guztian zehar.

Aseginolazak azpimarratu duenez, adin guztietarako ekintzak izango dira, eta erritmo onean doazela ziurtatu du. Ohiko parte-hartze kopuruak espero dituzte: margo lehiaketan artista ugari, patata tortilla lehiaketan hogei bikote inguru, eta herri bazkarian 300 herritar inguru. Izen-emateak zabalik daude oraindik, eta txartelak eskuragarri daude Urdin, Sugar, Kirkil, Haka, Leizea eta Amone tabernetan, 13 euroan.

Egitarauak honako ekintzak biltzen ditu: ostiralean, apirilak 17, 19:00etan KantAzak izango dira. Larunbatean, apirilak 18, 09:00etan Aire Libreko II. Margo Lehiaketa hasiko da Barrenan, 11:30ean Tortilla patata txapelketa Plaza Nagusian, eta 14:30ean herri bazkaria kanpoko pilotalekuan. Arratsaldean, 17:00etan Marsel Magoa Garagartza plazan, 18:00etan Burrunbazale txaranga Garagartza plazatik hasita, eta 18:00etan margo sari banaketa eta erakusketa irekiera Barrenan. Eguna amaitzeko, 21:00etan Realaren finala pantaila handian Plaza Nagusian, eta finalaren ostean, Skabidean eta Zankarron blues kontzertuak.