TREBA Gazteak programa, Gipuzkoako Foru Aldundiko Gazteria Zuzendaritza k bultzatutako ekimena, gazteen ahalduntzea sustatzeko helburuarekin, Legazpiko Kultur Etxean izango da azaroan. Jarduera hauek aisialdia, prestakuntza eta sorkuntza uztartuko dituzte, gazteen intereseko gaiak jorratuz, hala nola teknologia berriak, feminismo intersekzionala eta ongizate emozionala.
Legazpiko Udala, Haurraren, Nerabearen eta Gazteriaren Zerbitzuaren bitartez, programaren aurreko sei edizioetan parte hartu du, eta iaz TREBA Nerabeak programan ere hartu zuen parte. Aurten, gazteen hausnarketa eta parte hartze guneak zabalduko dira.
Azaroaren 13tik 15era bitartean, scape room bat egingo da Kultur Etxean. Bertan, parte hartzaileek erronkak gaindituz hurbilduko dira hiru gai nagusietara: teknologia digitalak eta algoritmoen eragina gazteen bizitzan, feminismo intersekzionala eta ongizate emozionala. Parte hartzeko, aurrez izena eman beharko da 2 eta 6 pertsonako taldeetan, 30 urte arteko gazteentzat. Saioak ordubetekoak izango dira.
Azaroaren 27an, Agueda Blasco Egia k dinamizatutako 'Aske ON: anitz eta desberdin' tailerra izango da. Bertan, 17 eta 24 urte bitarteko gazteek identitatearen eraikuntza sozialaz hausnartuko dute, eta generoaren, botere-harremanen eta beste ardatz sozialen eragina aztertuko dute beraien bizitzetan. Helburua da barneratutako ideiak kritikoki zalantzan jartzeko tresnak eskaintzea eta askatasun handiagoz bizitzeko bidean aurrera egitea.
Jarduera honekin lotuta, gazteek Malen Altuna eduki sortzailearen laguntzarekin podcast bat prestatzeko aukera izango dute, landutako gaiak beraien ikuspegitik eta ideietatik lantzeko.
Azaroaren 28an, TREBA Gazteak podcastaren atal bat grabatuko da. Malen Altunaren gidaritzarekin, gazteek podcast baten sorkuntza eta grabazio prozesua ezagutuko dute. Parte hartu ahal izango dute beraien ideiak eta iritziak partekatuz, grabazioa ikusle gisa jarraituz edo bi aukerak konbinatuz. Horrela, podcasta beraien ikuspuntuak adierazteko eta eguneroko errealitatean eragina duten gaiak lantzeko gune bihurtuko da.
Jarduera guztiak doakoak dira, baina ezinbestekoa da aurrez izena ematea. TREBA Gazteak programak gazteen interesetara eta komunikazio-moduetara hurbiltzeko apustua egiten du, aisialdia, prestakuntza eta parte hartzea uztartuz.
