Legazpik arrakastaz ospatu zuen larunbatean, urriaren 17an, bere Egun Interkulturalaren edizio berri bat. Eguraldi txarrari aurre egin behar izan bazioten ere, Azoka eta Urbeltz gunera bildu ziren herritarrek ez zioten festari etenik eman. Ekitaldiak kolorez, musikaz, dantzaz, zaporez eta, batez ere, elkarbizitzaz bete zuen herria.
Udalak esker ona adierazi die ekitaldia posible egin duten pertsona, elkarte eta erakunde guztiei. Parte-hartzaileei eta herrialdeetako ordezkariei bereziki eskertu die beraien kultura, gastronomia, jantziak, dantzak eta irribarreak partekatzeagatik. Antolakuntzan, muntaketan eta laguntzan aritu direnen lana eta esfortzua ezinbestekotzat jo ditu, dena prest egoteko eta, eguraldiak eman dituen gorabeheren aurrean, festa bikain ateratzeko.
Babesle eta kolaboratzaileei ere eskerrak eman dizkie emandako babesagatik eta proiektu komunitario honetan sinesteagatik. Azkenik, bertaratu ziren herritarrei eskerrak eman dizkie Azokara eta Urbeltzera gerturatu izanagatik, giro bikaina sortzeagatik eta aniztasuna elkarrekin ospatzeagatik.
Egun berezi honek berriro ere erakutsi du aniztasunak aberastu egiten gaituela eta, euskara eta euskal kultura oinarri hartuta, Legazpi denon artean eraikitzen dugula. Eskerrik asko eta datorren urtera arte.
