Zumarragako zortzi bizilagunek, lan mundura itzultzeko zailtasunak dituztenak, igeltserotza ikastaro bat amaitu dute. Gaur, apirilaren 13an, diplomak jaso dituzte udal brigadaren biltegian egindako ekitaldi batean. Bertan izan dira Mikel Serrano Zumarragako alkatea, Mikel Torres lehendakariorde eta Ekonomia, Lan eta Enpleguko sailburua, eta Arantxa Niño Lanbideko Enplegu eta Formakuntza zuzendaria.

Parte-hartzaileek bi hilabeteko prestakuntza teorikoa jaso dute, eta datozen sei hilabeteetan arlo praktikoa eta teorikoa uztartuko dituzte. Aurtengo edizioan igeltserotza ikasi dute. Programan parte hartu duten zortzi pertsonak Jose Maria Heras, Moises Gorjon, Alfredo Daniel Borja, Iñaki Castillo, Said Kaddari, Ramon Nieto, Jose Eugenio Heras eta Gorka Sanchez dira.

Egitasmo honetan hainbat erakundek hartzen dute parte: Eusko Jaurlaritzak, Zumarragako Udalak, UGLE eskolak, Uggasa garapen agentziak eta Burdinaren Industriako Langileen Fundazioak. Parte-hartzaileei prestakuntza teknikoa, laguntza pertsonalizatua eta ikasitakoa praktikan jartzeko aukera eskaintzen zaie.

Aurtengoa programaren laugarren edizioa izan da, eta edizio bakoitzean zortzi pertsonak hartzen dute parte. Eusko Jaurlaritzak, Lanbideren bidez, 510.500 euro bideratu ditu lau urte hauetan, eta Zumarragako Udalak 83.936 euroko ekarpena egin du. Alkateak nabarmendu duenez, iazko ikastaroan parte hartu zuten lau lagun udal brigadan ari dira lanean, eta gainontzekoak lan poltsa batean daude, enpresek haien berri izan dezaten.

Torresek, bere aldetik, Zumarragako Udalari eskerrak eman dizkio, eta udalerria adibide gisa jarri du horrelako egitasmoetan. Era berean, parte-hartzaileen ahalegina goraipatu du, lan merkatuan kualifikazioa gero eta garrantzitsuagoa dela azpimarratuz. Adierazi duenez, 45 urtetik gorakoek edo desgaitasunen bat dutenek lan bat aurkitzeko zailtasunak dituzte, eta horiei laguntzea da helburua, kalitatezko enplegua lortzeko.