Joanes Plazaola Zumarragako idazleak Urruzuno literatura saria irabazi du laugarren aldiz, Ahanztuaren lubakian izeneko lanarekin. Obra honek esperientzia traumatikoak eta iragan mingarri batekin dugun harremanaren kudeaketa aztertzen ditu, iragan hori ahaztu ezin duen pertsona baten istorioaren bidez.
Sari banaketa ekitaldia ekainaren 19an izango da, Donostiako Miramar jauregian. Idazleak adierazi duenez, Urruzuno esperientzia oso aberasgarria izan da berarentzat, idazten jarraitzeko eta hobetzeko motibazioa eskaini diolako.
“"Urruzuno esperientzia aberasgarria izan da. Alde batetik, idazten jarraitzeko eta hobetzeko motibazioa eskaini dit. Bestalde, gainerako irabazleekin egindako egonaldiak oso atseginak eta interesgarriak izan dira: jende berria ezagutzeko aukera eman didate, hainbat euskal idazle eta musikari ezagutu ditut eta hobeto idazten erakutsi dit."
Aurten ere, irabazleek astebeteko egonaldia egingo dute abuztuan, jarduera kultural eta literarioak egiteko. Gainera, irabazleen lanak Sagastiberri bilduman argitaratuko dira. Idazleak txikitatik izan du irakurzaletasuna, eta horrek ideia berriak ematen dizkio idazterakoan.
Bigarren batxilergoa Urretxu-Zumarraga ikastolan amaitu ondoren, datorren ikasturtean Matematikako gradua ikasteko asmoa du.
