Aurtengo Mendi Festak ekitaldi ugari bilduko ditu, besteak beste, dantza bertikal ikuskizun bat, liburu aurkezpen bat, dokumental emanaldiak, herri bazkari bat, eta musika emanaldiak. Eskalada ere izango da protagonista nagusietako bat, adin eta esperientzia maila guztietako parte-hartzaileentzat.
Maiatzaren 22an, ostirala, Harrobi dantza bertikal taldeak Geure(r)a ikuskizuna eskainiko du Ederrena pilotalekuan, gaueko 22:00etan. Gainontzeko ekitaldiak maiatzaren 23an izango dira, larunbata, Gernikako Arbola plazan. Eguraldi txarra eginez gero, Ederrena pilotalekura lekualdatuko dira.
Larunbateko programak eskola kiroleko haurrentzako eskalada saioak barne hartzen ditu goizeko 9:00etan, eta hasiberrientzako eskalada aukerak 11:00etatik aurrera. Haurrentzako jolasak eta ikastaroak ere antolatuko dira, baita tonbola bat ere. Esperientziadun eskalatzaileek 12:30etik aurrera izango dute beren txanda. Herri bazkaria 14:00etan egingo da.
Arratsaldean, 15:00etan, haurrentzako zine emanaldia izango da. Ondoren, 16:00etan, Juan Vallejok (Historias) bajo cero liburua aurkeztuko du, eta ekitaldia Juanjo San Sebastianek gidatuko du. 17:00etan, Patxi Arozenak eta Patxi Usobiagak kirol eskaladari buruzko solasaldia eskainiko dute. Belaunaldien arteko eskalada erronka 18:30ean izango da, eta ondoren afari-merienda eta zozketa 19:30ean.
Gaueko programazioak Jon Maia eta Gorka Hermosaren kontzertua dakar 20:30ean. 21:00etan, Xabier Ormazabal bekaren irabazlearen izena eta bere proiektua ezagutzera emango dira. Aurten lau proiektu aurkeztu dira. Ondoren, Iker Urangaren Izarren zaunka dokumentala 21:30ean eta Silvia Vidalen Alaska: un pas mes dokumentala 22:00etan. Amaitzeko, Doctor Deseo taldeko Francisek kontzertua eskainiko du 23:00etan, gitarrista eta saxofonista lagun dituela.
“"Mendi festa berezia da. Gauza asko ditu azpimarratzeko. Parte hartzen duen jendeak oso festa kuttuna egiten du. Xabierren izpirituak presentzia fisikoa du ia bi egun horietan. Jende askok parte hartzen du, jendearen arteko hartu-emana estua da, adin ezberdinetako jendea elkartzen da… Xabierrekin lotutako baloreak ditu: mendia, natura, elkarrekin gauzak egitea, umiltasuna, elkartasuna…"
Antolatzaileek eskerrak eman dizkiete udalbatzari eta teknikoei, proiektuan sinesteagatik eta amets bat errealitate bihurtzeagatik. Jaialdia etengabe hazi dela azpimarratu dute, eta estatu mailan diru gehien eskaintzen duen beka bihurtu dela. Babesle ugariren laguntza eta Urretxu eta Zumarragako hirurogei denda baino gehiagoren parte-hartzea nabarmendu dute tonbolarako produktuak emanez. Gainera, hirurogei pertsona baino gehiago ariko dira lanean jaialdiaren antolaketan, eta Doctor Deseoko Francisek doan joko du, bere ekarpena egin nahian.
