Ordiziako Udalak atzo egin zuen udalbatzarrean onartu zuen Etxebizitza Plana, EH Bildu, EAJ eta PSE-EEren aldeko botoekin eta Ordizia Orain-Elkarrekin Podemosen abstentzioarekin. Plan honek herriko etxebizitza arazoari irtenbideak bilatu nahi dizkio, batez ere gazteenen artean.
“"Etxebizitza Ekintza Planaren hasierako onarpen honekin erakustaldi publikoa ireki da herritarrek ekarpenak egin ditzaten. Baina esan dezakegu guk gure lana egin dugula, ez dakigu zerbait gehiago osatuko den ala ez. Baina honekin ziklo bat ixten dugu."
Planaren oinarria Ordiziako Etxebizitza diagnostikoa izan da, herriko etxebizitza errealitatea aztertzeko. Diagnostiko horrek agerian utzi du etxebizitza duin eta eskuragarri bat lortzeko zailtasunak, bereziki gazteen artean. Horren aurrean, planak ekintza zehatzak proposatzen ditu egoera hori iraultzeko.
Lau ardatz nagusitan egituratzen da plana. Lehenengoak, alokairu eskuragarria sustatzea du helburu, babes publikoko parkea handituz eta etxebizitza hutsak mobilizatuz. Bigarren ardatzak, hiriko birgaitzeen bidez, dagoen etxebizitza parkea hobetzea eta alokairura bideratzeko laguntzak eskaintzea planteatzen du.
Hirugarren ardatza diru-laguntzak eta prestazioak indartzera bideratuta dago, gazteen emantzipazioa eta adinekoen beharrak bultzatuz. Azkenik, laugarren ardatzak gobernantza eta erakunde arteko koordinazioa azpimarratzen du, etxebizitza arazoa egiturazkoa dela eta udalerri batek bakarrik ezin diola aurre egin aitortuz. Horretarako, Eusko Jaurlaritzako Etxebizitza Sailarekin eta beste erakunde batzuekin koordinazioa funtsezkoa dela adierazi da.
Etxebizitza Planaz gain, udalak beste plan batzuk ere burutu ditu, hala nola Irisgarritasun Plana, Mugikortasun Plana, Mapa Morea eta Energia edo Klima Aldaketari aurre egiteko Plana. Guzti hauek etorkizuneko Plan Orokorraren erronkak markatzen dituzte.
