Ekintza hau Ordizia 2030 Ekintza Plana ren baitan kokatzen da, duela lau urte hasitako modernizazio estrategiari jarraipena emanez. Helburu nagusia CO2 isuriak %30 murriztea eta argiztapen sistema askoz eraginkorragoa izatea da.
Udalaren aurreikuspenen arabera, argiztapen berriak energia-kontsumoa gutxienez %75 murriztea ahalbidetuko du. Horrez gain, faktura elektrikoan aurrezteaz gain, mantentze-kostuetan ere arintzea espero da, LED sistemak iraunkorragoak direlako eta arreta tekniko gutxiago behar dutelako.
Operadoreak udalerriko hainbat gunetan arituko dira lan horiek egiten. Esaterako, San Bartolome auzoan, Egutera bidean, Santa Ana ko aparkalekuan, N-I errepiderako irteeran, eta Sanperio, Arana eta Arramendi kaleetan, besteak beste.
Hedapen honen barruan, Udalak arreta berezia jarri du Joseba Rezola pasealekuan. Bertan, lehendik dauden lanparak aldatzeaz gain, hiru farola berri instalatuko dira segurtasuna indartzeko. Hobekuntza hau bigarren fase batean osatuko da aurten zehar, 6. eta 8. zenbakietako eraikinen aurrean beste bi farola gehiago jarriz, pasealekuan guztira bost argi berri osatuz.
Lan sorta berri honekin, Ordiziak energia-eraldaketan aurrera egiten jarraitzen du. Gaur egun, udalerriko argiteriaren erroldak 1.530 argi-puntu ditu. Esku-hartze honen ondoren, sarearen %83,8k, hau da, 1.282 argik, LED teknologia izango dute jada. Gainerako %16,2a (247 argi) pixkanaka osatzea espero du Udalak datozen ekitaldietan, hamarkada amaitu baino lehen udalerri eraginkorragoa, seguruagoa eta iraunkorragoa lortzeko helburuarekin.
