Urte luzez erabilera publikorik gabe egon den Anselmoren Baratza izeneko gunea berreskuratzeko lanak abiatu ditu Ordiziako Udalak. Garagartza plaza eta Ordizia kalea lotzen dituen eremu hau naturarekin, biodibertsitatearekin eta herritarren erabilerarekin uztartuko duen berdegune bihurtuko dute.
Adur Ezenarro alkateak emandako informazioaren arabera, proiektua bi fasetan gauzatuko da. Lehenengo fasea martxan da jada eta hilabete eta erdiko iraupena izango du. Lan horien artean, eremua garbitu, sastrakak kendu, topografia egokitu eta irisgarritasuna hobetuko dute. Gainera, Garagartza plazara zein Ordizia kalera modu eroso eta irisgarrian lotuko dituen ibilbide bat sortuko da. Lehen fase honek 49.667,50 euroko aurrekontua du.
Bigarren fasean, espazioaren osagarriak jarriko dira, hala nola kale-altzariak, argiztapena, ureztatze-sistema eta iturria. Alkateak aurreratu duenez, urte amaierarako lanak amaituta egotea espero dute.
Ezenarro alkateak azpimarratu du proiektu hau hiri-berroneratze estrategian kokatzen dela. «Herrigunean naturari lekua egiteaz gain, klima-aldaketaren aurrean babesgune klimatiko berri bat sortu, eta herritarrentzako topagune atsegin zein irisgarri bat irabaziko dugu», adierazi du.
1.551 metro koadroko espazioa da, eta bertako landaredia babestu eta indartuko da, fauna txikiarentzako habitat egokiak sortuz eta inguruko etxebizitzen pribatutasuna bermatuko duen pareta begetala eratuz. Aurretik zeuden zuhaitz gehienak mantendu egingo dira, eta bertako espezie gehiago landatuko dira.
Espazioaren erdialdean, zelai ireki bat sortuko da, plaza edo auditorio txiki baten moduan, herritarren sozializazio gune gisa.
