Legazpi eta Donostia arteko autobus zerbitzua indartuko da ekainaren 1etik aurrera, GO07 lineari bi autobus gehiago gehituta norabide bakoitzean. Gainera, Legazpi eta ospitalea lotzen dituen DG09 linearen ordutegia ere egokituko dute, Donostiara joateko transbordoa Zumarragan errazteko.

Azahara Dominguez, Mugikortasuneko, Turismoko eta Lurralde Antolaketako diputatuak, eta Oscar Valbuena, Legazpiko Garapen Iraunkorrerako, Energia Trantsiziorako eta Garraioko zinegotziak, iragarri dute erabaki hau, linearen erabilera datuak eta bizilagunek egindako transbordoak aztertu ondoren.

Zehazki, gaur egun Zumarragatik 10:15ean eta 12:15ean ateratzen diren autobusak, ekainaren 1etik aurrera, Legazpitik aterako dira 10:05ean eta 12:05ean. Bestalde, Donostiatik 16:45ean eta 17:45ean irteten diren autobusek ibilbidea Legazpiraino luzatuko dute. Zerbitzu hauek iazko maiatzean martxan jarritakoekin osatuko dira.

Diputatuak azaldu duenez, azken urteko datuek erakutsi dute ordu horietan egin dela jende gehienak transbordoa, eta horregatik erabaki da autobusak ordu horietan Legazpitik abiatu edo bertara iristea. Guztira, astelehenetik ostiralera, zortzi zuzeneko konexio izango dira Donostia eta Legazpi artean, lau goizean eta lau arratsaldean.

DG09 linearen ordutegiak ere egokitu egingo dira, Legazpi, Zumarraga eta Ospitalea lotzen dituenarenak hain zuzen ere. Horrela, bermatuko da bidaiariek Zumarragako geltoki intermodalean Donostiara doan linearekin transbordoa egin ahal izatea. Gogorarazi dute, halaber, Arrasate-Oñati-Legazpi-Zumarraga bidea egiten duen DG04 linea erabilita ere posible dela transbordoa egitea Zumarragan Donostiara joateko.

Ordutegi berriak Lurraldebuseko webgunean edo 900 300 340 telefonoan kontsultatu ahal izango dira.