Santikutz jaien asteburu nagusia amaitu ondoren, Legazpiko Udala udako programazioan zentratu da. Gaur, maiatzak 5, Uztalai udalekuetarako eta udako kirol eskaintzarako izen-emate epea hasi da. Gainera, datorren astean, maiatzak 11, marrazketa ikastaroan izena emateko aukera ere zabalduko da.

Uztalai udalekuak ekainaren 29tik uztailaren 24ra bitartean egingo dira, eta HH-2tik LH4ra bitarteko haurrei zuzenduta daude. Gurasoek zaintza zerbitzua erabili ahal izango dute. Izen-emateak maiatzaren 18ra arte egongo dira zabalik udaletxean edo udalaren webgunean. Arkatza elkarteak antolatutako marrazketa ikastaroa Kultur Etxean izango da ekainaren 23tik uztailaren 18ra, 2020an edo lehenago jaiotako haur eta gazteentzat. 28 plaza daude, eta izena maiatzaren 11tik 29ra eman daiteke Kultur Etxean.

Bikuña kiroldegiak kirol eskaintza zabala prestatu du, igeriketa, padela, gazte zumba, crossfit gaztea eta natur inguruneko jarduerak barne. Igeriketa 3 eta 7 urte bitarteko haurrentzat da, eta crossfita 12 eta 16 urte bitartekoentzat. Gainerako jarduerak 8 eta 14 urte bitarteko haur eta gazteei zuzenduta daude. Igeriketa, zumba eta crossfit ikastaroak hilabete osokoak izango dira, uztailaren 1etik 30era, eta padela, multikirola eta naturako jarduerak hamar eguneko txandetan eskainiko dira, uztailaren 1etik 11ra eta uztailaren 14tik 24ra.

Kirol jardueretan izena emateko epea maiatzaren 30era arte egongo da zabalik. Interesdunek kiroldegira joan, telefonoz deitu edo posta elektronikoz harremanetan jarri daitezke. Informazio zehatzagoa udalaren webgunean eta kiroldegian, Kultur Etxean eta udaletxean eskuragarri dagoen esku orrian aurki daiteke.