Aurten Joxe Miel Iztueta, Lazkao Txiki izenez ezaguna, jaio zenetik 100 urte betetzen direla eta, Argi Berri elkarteak bere omenezko Bertso-paper Lehiaketaren 35. edizioa antolatu du. Ekimen honekin, Iztueta bertsolaritzaren eredu gisa zabaltzen jarraitu nahi da.

Lehiaketa hiru mailatan banatuko da: gaztetxoena (13 urte artekoentzat), gazteena (14 eta 18 urte bitartekoentzat) eta helduena (2007an edo aurretik jaiotakoentzat). Parte-hartzaile bakoitzak nahi adina bertso-paper bidali ahal izango ditu. Gaztetxoek 2 eta 4 bertso artean idatzi beharko dituzte, eta gazte eta helduen mailatan, berriz, 8 eta 12 bertso artean.

Bertsoen neurria eta doinua libreak izango dira maila guztietan. Gazte eta helduen kasuan gaia ere norberak aukeratu ahal izango du, baina gaztetxoek 'Lazkao Txikik 100 urte' gaiaren inguruan idatzi beharko dute. Lanak uztailaren 1a baino lehen bidali beharko dira Argi Berri elkartearen helbide elektronikora.

Bertsoek jatorrizkoak, argitaratu gabeak eta beste lehiaketa batean saritu gabekoak izan behar dute. Lanak izenordez sinatuko dira, eta egilearen datu guztiak mezu bereko beste dokumentu batean bidali beharko dira. Sari-banaketa Ordiziako Euskal Jaien barruan egingo da irailaren 6an.

Maila bakoitzeko lehen hiru sailkatuek diru-sariak jasoko dituzte, 50 eta 500 euro bitartekoak, eta 'Txiki' bana. Berrikuntza gisa, aurten maila bakoitzean eskualdeko lan hoberenaren saria ere egongo da, 50 euroko balea 'puntutan' bertsolaritza arropa markako produktuak erosteko. Epaimahaia Argi Berri elkarteak antolatuko du Ordiziako Udalaren oniritziarekin.