Lazkaon jai giroa nagusi da, eta Lazkaoko Ikastola izan da protagonista nagusia. Goizean, Kilometroak jaiaren “ibili-ibilian buelta” abestiaren bideoklipa aurkeztu dute, eta ondoren, ostiralero antolatzen duten Kantujiraren X. urteurrena ospatu dute. Arratsaldean, herriko jaien hasierako txupinazoa jaurti aurretik, bideoklipa berriro proiektatu dute.

Ikastolako zuzendaritzak adierazi duenez, aurten Ikastolen aldeko jaia duela 50 urte sortu zen lekura itzuliko da, eta abesti honekin “jai erraldoi horretan parte hartzera dei egiten” diete herritarrei. Kilometroak-eko abestia Amaia Agirre bertsolariaren eta Xabier Zabala konposatzailearen artean sortu da, Agirrek letra eta Zabalak doinua jarri diotelarik.

Abestian hainbat musikari ezagunek ere parte hartu dute, besteak beste, ETS taldeko Iñigo Etxezarreta, Nøgen taldeko Ane Negueruela, Xabi Solano eta Alaitz eta Maider. Alaitz Telletxeak, trikitilari eta ikastolako irakasleak, nabarmendu du kanta hau ez dela soilik abesti bat, “gure komunitatearen eta balioen isla ere badelako” eta bidea urratzen lagunduko diela.

Bideoklipa Mikel Balerdi eta Deñe Garcia-Bravok osatzen duten Aztarna productions ekoiztetxeak ekoitzi du. Ikastolak Lazkaoko herritarrei eman nahi izan die protagonismoa, eta horregatik, herriko beste eragile batzuk ere parte hartu dute, hala nola Lazkao Txiki musika-eskola, Oin-Arin dantza taldea eta Lazkaoko buruhandi eta erraldoien konpartsa.

Kantujira ekimena ostiral goizero egiten da Lazkaon, ikasle eta irakasleek, herriko eragileekin batera, hainbat euskal kanta abesten dituztelarik herriko plazan. Ekimen honen helburua euskararen eta euskal kulturaren ezagutza eta transmisioa sustatzea da. Duela 10 urte abian jarri zenetik, astez aste hazi egin da, eta ikastolako ordezkariek adierazi dute gaurko Kantujira “bereziagoa” izan dela, Kilometroak 26ko kanta eta bideokliparen aurkezpenean ikastolako ikasle guztiek parte hartu baitute.